Экология • 14 Маусым, 2021

Көміртегі ізі: Планета ресурсын сарқып алмау туралы пайым

59 рет көрсетілді

Алматы қаласында көміртегі ізін азайту жөніндегі әріптестік жоба бастау алып, мәмілеге кел­ген тараптар бұл істі ағаш отыр­ғызудан бастады. Осылайша Eurasian Environmental Fund (EEF) коммерциялық емес ұйы­мы, Mastercard, Еуразиялық банк және қаланың Жасыл эконо­мика басқармасы тұрақты даму қағидаттарына сәйкес көмір­тегі ізін азайту мақсатында эко­логиялық жобаларды іске асыру жөніндегі ынтымақтастық туралы меморандумға қол қой­ды.

Алғашқы қадам ретінде мау­сымның басында Есентай өзенінің рекреациялық аймағында аллея отырғызылды. Бірақ карантин шаралары ескеріле отырып, жұмысты мамандандырылған компания жүргізді. Еуразиялық банк жақсы жерсінуі үшін 75 ағашты өз топырағымен отыр­ғызуды қаржыландырып әрі бұдан былай екі жыл бойы аллея­ны күтіп-баптау шығындарын өз мойнына алды.

«Былтыр қала бойынша ре­корд­қа қол жеткізіп, 282 мың ағаш отырғыздық. Бұрын қалада жылына 30-40 мыңдай ағаш отырғызылатын. Көгалдандыру жұмыстары негізінен Алатау және Наурызбай аудандарының біріктірілген аумақтарында жүр­гізілді. Көктемде 64 мың ағаш көшеті бой түзеді. Жалпы жыл соңына дейін 300 мың шыбық отырғызу жоспарланып отыр. Сондықтан қала әкімінің 1 млн ағаш отырғызу жөніндегі бас­тамасын қолдауда бизнес пен қоғамның кез келген көмегін қуана қабылдаймыз», деді Жасыл экономика басқармасының басшысы Наталья Ливинская.

«Біз қала мен оның төңірегін­дегі экологиялық ахуалды жақ­сарту үшін мемлекеттік ор­ган­­­дармен, бизнеспен, қо­ғам­­дық ұйымдармен және эко­көшбасшылармен бірлескен түр­лі табиғат қорғау шараларын іске асырғалы отырмыз. Мақ­сатымыз – жаһандық экологиялық сын-қатерлерге на­зар аудару және оны шешу үшін нақты қа­дамдарды жү­зеге асыру. Осы мақсатта 2021 жылдың 13 мамырында «Ас­тана» халықаралық қаржы ор­та­­лығының өкілет­тігімен АХҚО Жасыл қаржы ор­та­лы­­ғының қолдауымен Eura­sian Environmental Fund ком­мерциялық емес ұйымы тіркелді», деді Eurasian Environmental Fund КЕҰ бас директоры Роза Нұртазина.

«Ел Президенті Қасым-Жомарт Тоқаев 2060 жылға қарай Қазақстанды көміртегі тәуел­ділігінен арылту міндетін қойды. Оны іске асырудың бір тәсілі – қалаларды көгалдандыруды қарқындату және жасыл технологияларды енгізу. АХҚО Қа­зақстанның экологиялық бағдар­ла­масына белсене қатысады және бизнес пен қоғамдастықты ынталандыру үшін қажетті ин­фрақұрылымды құрады», деді АХҚО Жасыл қаржы орта­лы­ғының бас директоры Айдар Қазыбаев.

Осынау көкейкесті шаруада Еуразиялық банк жасыл қар­жы технологияларын пайдалана отырып, өзінің дамуының жа­ңа кезеңін бастайды және эко­ло­гиялық мазмұндағы арнайы банк өнімін әзірлейді. Оның үс­тіне банк кез келген қазақ­стан­дық банктің төлем картасына бір жанасу арқылы ағаш отырғызуға қаражат аударуға мүмкіндік бе­ретін Қазақстандағы алғашқы NFC-постерлерді орнатады.

«Бүгінде банктердің қызметі тек қаржылық көрсеткіштермен және сауатты басқарумен ғана бағаланбайды. Банк қоғамның әлеуметтік және экологиялық дамуына атсалысуы тиіс. Біздің банктің күш-жігері жасыл экономика жобаларын қолдауға және экологиялық достық банк сервисін құруға бағытталады. Бұл қашықтан қызмет көрсету арналары мен онлайн-төлемдерді дамыта отырып, пластик пен қағаз пайдалануды біртіндеп азайтып, қайта жаңғыртылмайтын ресурстарды оңтайлы жұм­сайтынымызды білдіреді. Біз клиенттерімізбен бірге арнайы банк өнімдері арқылы ағаш отырғызуды жалғастыратын боламыз», деді Еуразиялық банктің басқарма төрағасы Валентин Морозов.

«Бүгінгі таңда климаттың өзгеруі әрқайсымызға өзінің теріс әсерін тигізуде. Әсіресе, ха­лық­тың әлеуметтік-экономи­калық осал топтарына оңай соқпайды. Біз бұл жағдайда бизнес эко­логиялық жауапкершілікті өз мойнына алуы тиіс деп санаймыз. Өйткені, планета ре­сурстарын сарқи отырып, эко­номикалық өрлеуге қол жеткізу мүмкін емес. Бұл жоба жақсы өзгерістерге алып келетініне сенімдімін. Қор­шаған ортаны қорғау – біздің ортақ ісіміз», деді Mastercard ком­паниясының Орталық Азиядағы бас директоры Рафал Трэпка.

Орайы келіп тұрғанда, Mas­tercard шығарындыларды қыс­қарту жөніндегі мақсаттарын өз бастамасымен SBTI (Science Based Targets Initiative) мақұл­даған алғашқы төлем компаниясы екендігін айту керек. Жақында компания 2025 жылға қарай парник газдарының энергетикалық тікелей және жанама шығарын­дыларын 38%-ға, ал басқа жа­нама шығарындыларды 2016 жылмен салыстырғанда 20%-ға қысқартуға ниетті еке­нін мә­лімдеді. Mastercard жаңғыр­тылатын энергия көздері мен энер­гия тиімділігін арттыру бағдар­ламаларына басымдық береді: күн панельдеріне Mas­tercard data-орталықтары тұты­натын энергияның 50% үлесі тиесілі. Компания жеткізілім тізбегіне байланысты шыға­рындылар 2020 жылдың со­ңында оның көміртегі ізінің 70%-дан астамын құрағанын атап өтті. Осыған байланыс­ты Mastercard жеткізушілерге пар­ник газ шығарындыларын азайту мақсаттарын анықтауға және оған қол жеткізуге қолдау көрсетуді жоспарлап отыр. Әріп­тестіктің нәтижесінде Mas­tercard клиенттері өздері қалдыр­ған көміртегі ізін есептеп, тұтынушылық мінез-құлқының әсерін бағалай алады. Сонымен қатар Mastercard қайта өңделген шикізаттан пластик карталар шығару жөніндегі әріптестікке де мұрындық болды.

 

АЛМАТЫ

 

Соңғы жаңалықтар

Шығыс «Қызыл» аймақта

Аймақтар • Кеше

Цифрлы теңге жобасы талқыланды

Экономика • 23 Шілде, 2021

Ақпараттық хабарлама

Егемен Қазақстан • 23 Шілде, 2021

Қазақстанда вакцинаның қанша қоры бар?

Коронавирус • 23 Шілде, 2021

Ұқсас жаңалықтар