«Біздің ең басты құндылығымыз – Ахмет Ясауи кесенесі. Соның төңірегінде рухани мәдени орталық құрылды. Сондай-ақ жаңа қалыптасып келе жатқан жаңа әкімшілік орталық салынды. Үшіншісі – ескі қаланы қайта жаңғырту мәселесі, төртінші бағыт – қаланың төңірегіндегі климатқа, экологияға байланысты жобалар. Атап айтқанда, азық-түлік белдеуі, жасыл белдеу сынды бағыттар», деді облыс әкімі.
Облыста жалпы өңірлік өнім 2018 жылмен салыстырғанда 41%-ға артып, 2,4 трлн теңгені құраған, өнеркәсіптік өнім көлемі 18%-ға, ауыл шаруашылығы өнімі 34%-ға немесе 185,4 млрд теңгеге артқан. Соңғы 3 жылда негізгі капиталға бағытталған инвестициялар көлемі 1,6 трлн теңге болып, оның ішінде жеке инвестициялар көлемі 968,5 млрд теңгеге жетті. Пандемия кезінде де бәсеңдемеген қарқынды құрылыс жұмыстарының нәтижесінде 736 мың шаршы метр тұрғын үй пайдалануға берілді. Жалпы өңірлік өнімдегі шағын және орта бизнестің үлесі 21%-ға дейін жетіп, облыс бюджетінің көлемі 1,6 есе артты, яғни 893 млрд теңгені құрады. Биылдың 5 айында атқарылған облыстың маңызды әлеуметтік-экономикалық даму көрсеткіштеріне тоқталған Өмірзақ Шөкеев өнеркәсіп өнімінің көлемі 238,2 млрд теңге болып, өткен жылдың тиісті кезеңімен салыстырғанда 29,8 млрд теңгеге артқанын атап өтті. Өңдеу өнеркәсібінде 110,9 млрд теңгенің өнімі өндірілген. Өңірдің индустриялық аймақтарында жалпы құны 41 млрд теңгені құрайтын және 4 340 жұмыс орнын ашуға мүмкіндік беретін 60 жоба жүзеге асырылуда. Бүгінде TURKISTAN арнайы экономикалық аймағында инвестициялық жалпы құны 480,5 млрд теңге болатын 46 жоба іске асырылуда. Жалпы, биыл өнеркәсіп өнімі көлемін 565 млрд теңгеге жеткізу жоспарлануда. Ауыл шаруашылығында 5 170,3 млрд теңгенің өнімі өндіріліп, өткен жылдың сәйкес кезеңімен салыстырғанда 102,9%-ды құраған. Аталған салаға бағытталған инвестиция 1,9 есе артқан, яғни 15,3 млрд теңге болған. Қала аумағында азық-түлік белдеуін қалыптастыру аясында құны 35,5 млрд теңге болатын 6 серпінді ірі инвестициялық жобалар жүзеге асырылуда. Жыл қорытындысымен облысқа 800 млрд теңгеге инвестиция тарту жоспарлануда. Өңірдің өнеркәсіптік әлеуетін дамыту мақсатында «Састөбе» химиялық кешені, мұнай өңдеу зауыты, көмір-химиялық, фосфор кендерін өңдеу зауыттары, тұрмыстық техника өндірісі сынды жобаларды іске қосу көзделуде. Нәтижесінде, 5 мыңнан аса адам жұмыспен қамтылады.
Түркістан қаласында туризм саласын дамыту, оның әлеуетін арттыру әрі туристерге тартымды ету – бүгінгі күннің басты талаптарының бірі. Бүгінде «Керуен сарайға» күн сайын мыңдаған адам келеді. Кешен жергілікті мың тұрғынды тұрақты жұмыспен қамтып отыр. Тарихи және мәдени мұраға бай өңірде Түркістан, Кентау қалалары мен Отырар, Ордабасы, Бәйдібек аудандары бағытында тарихи-танымдық туризмі, Сарыағаш курорты аумағында емдік-сауықтыру туризмі, Түлкібас, Төлеби, Қазығұрт аудандарында экологиялық туризм түрлері қарқынды дамып келеді. Соның бірі ретінде туризмді дамытудағы алар орны ерекше «Қасқасу туристік-рекреациялық кешені» жобасы іске асырылмақ.
«Жобаны жүзеге асыру мәселесін 12 жыл бұрын қайта көтерген болатынбыз. Қазір тағы оралдық. Бүгінде өз қаржысына салатын инвестор табылды, ал біз инфрақұрылымды жеткізіп беруіміз қажет. Яғни «Қасқасу туристік-рекреациялық кешені» жобасы таяу арада Үкіметте талқыланып, шешілетін болады», деді Ө.Шөкеев.
Сондай-ақ 2025 жылға дейін Түркістан – Шымкент – Ташкент арасында жоғары жылдамдықты теміржол жобасын іске асыру жоспарлануда. Бұл жобаны іске асыру екі ел арасындағы экономикалық ынтымақтастық пен туризмді дамытуға оң әсер береді. Облыс әкімінің есебінше, 2025 жылы туристер ағыны мен келушілер санын 2 млн адамға дейін арттыру көзделуде.
Облыс әкімі жаңа құрылған Сауран ауданы мен Кентау қаласының ертеңіне қатысты ақпарат берді. Кентауда жылу мәселесі өзекті. Бұл орайда көгілдір отын пайдаланылып, әр үйге жылу беру көздерін орнату жолы қарастырылуда. Баспасөз мәслихатында Бағыс ауылына қатысты мәселенің шешімін тапқаны да айтылды. «Екі мемлекеттің арасындағы шекараны анықтауда бірнеше процедура жүзеге асырылады. Кезінде демаркация өтті, бірақ делимитация толық аяқталмаған. Осыған қарамастан биыл Мемлекет басшысының тапсырмасымен Үкімет, Сыртқы істер министрлігі, облыстық әкімшілік, барлығы бірігіп үлкен кешенді жұмыс атқарды. Нәтижесінде, бұрынғы шешілмей тұрған 740 гектар жер облыс аумағына қосылды», деді облыс әкімі.
Түркістан облысы