COVID-19: Босаңсуға болмайды

Расымен, індет жұқтырғандар саны азайып, жағдай тұрақталды ма дегенде әлемнің бір бұры­шынан эпидемиялық ахуалдың ушы­ғып келе жатқанын естисің. Толқыннан – толқынға ұста­ны­мымен өмір сүріп жүргендейміз.

Футболдан Еуропа чемпио­наты өтіп жатқан көршілес Ре­сей қайта да­был қаға бастады. Ал­ғаш­қылар­дың бірі болып өз вакци­насын шығар­ғанымен, ел билігі халықты жаппай вакциналауды сәтті өткізе алмаған секілді. Қа­зіргі уақытта Мәскеуде індет жұқтырғандар саны өткен жылдың желтоқсан айындағы деңгейге жетті, ал ауруханаға түскен науқастар саны өткен аптамен салыстырғанда 70 пайызға өскен. Кейбір сарапшылар екі-үш апта­дан кейін ел астанасындағы ауру­ханаларда орын жетпеуі мүмкін деп ескертіп отыр.
Спорттық іс-шара өтіп жат­қан Санкт-Петербургтің билігі де қауіп­сіздік шараларын кү­шей­те бастады. 15 тамызға дейін қаладағы мемлекеттік меке­мелердің ж­әне унитарлық кәсіп­­орын­дардың қызметкерлерін вакцина­лау жүргізіледі. Сондай-ақ Санкт-Петербург әкімшілігі 20 маусымнан бастап Еуропа фут­бол чемпионатының фан-айма­ғындағы көрермендер санын 5-тен 3 мың адамға дейін қысқартты.

Ресейлік денсаулық сақтау мамандары бірнеше айдан бері вирустың Үндістанда табылған дельта түрі Ресейге жетіп, тез таралатынын ескертіп келген. Кейбір дәрігерлер шетелден және Ресей аймақтарынан келген футбол жанкүйерлері қалада вирустың дельта нұсқасын та­ратады деп қауіптенеді.
Осындай қатер Бразилияға да төніп отыр. Елдегі COVID-19-бен байланысты өлім саны 500 мыңнан асты, бұл – әлемдегі екінші көрсеткіш. Мамандарды вакциналаудың баяу жүруі алаңдатуда. Пандемия бастал­ға­лы бері ел билігінің әрекетіне көңілі тол­маған халық қауіпсіздік шаралары үшін билікті кінәлап отыр. Африка мен Үн­дістанда да дағдарыс жалғасып жатыр.

Жаз айларындағы туризм мау­сымы­нан екінші жыл құр қал­ғысы келмеген Еуропа тұр­ғындарды вакциналауды қар­қынды жүргізіп, шекарадан тек екпе алғандарды өткізбекші. Жақында The Washington Post басылымы жүргізген талдау вакциналау қарқынды жүрген аймақта індет жұқтырғандар саны аз, ал керісінше екпе алмағандар ара­сында жоғары деген қоры­тын­дыға келген. Болашақта вакцина алмаған жандар үшін шектеу көбеймей ме деген сұрақ туады. Өйткені қазірдің өзінде мамандар вакцинаның маңызын арттырып, індетпен күресудің өзге жолы жоқ екенін айтып жүр.

Маусымның үшінші жек­сен­бісінде медицина қызмет­кер­лерінің күнін атап өткен елдер ақ халатты абзал жан­дардың ерен еңбегін қайталап айтудан шар­ша­майды. Саладағы дағдарысты, ауыртпалықты өз мойнына ал­ған мамандардың кеңесі мен ескертуіне мән бермесек бол­майды. Осыдан тура бір жыл бұрын еліміздегі жағдай күрт ушы­ғып, ең күрделі кезеңдердің бірі болғаны есімізде. Сол себепт­і індет толық жойылмай, босаң­судың реті жоқ.