Коронавирус • 28 Маусым, 2021

«Дельта» штамының белгілері қандай?

2030 рет көрсетілді

Екінші жылға ұласқан індеттен ел енді есін жия бастағандай болған тұста Алматыда «үнді» штамы анықталып қана қоймай, осы аптада індет жұқтырғандар саны қайта көбейе бастады. Эпидемиялық ахуалдың бұлай өзгеріп шыға келуінің басқа да себептері бар. Ел сақтық шараларын ұмытты, той-томалақ қайта басталды. Жазғы демалысқа шыққан жұрт еренсіз қыдырып, шомылып жүр. Эпидемиологтер індеттің жаңа толқыны басталуы мүмкін екендігін жоққа шығармайды.

Коронавирус мың құбылып, түр­леніп жатыр. Байқаған адамға індеттің жаңа штамдары бұрынғыдан да жұқпалы, дегенмен өлім-жітімі аз екені білінеді. Бірақ бұл баршаға ортақ жағдай емес. Және бұдан былай да бұл індет ізімізден еріп жүре беретіні белгілі болды. Айта кету керек, Алматының бас санитарлық дәрігері Жандарбек Бекшин қалада коронавирустың жаңа «үнді» штамы тіркелгені туралы хабарлай келе, ресейлік және қазақстандық вакциналар атауы белгілі, мутацияланған алты штамнан қорғайтынын ресми мәлімдеген болатын.
Ендігі жағдай не болмақ? Мәселен, Алма­тыда коронавирусты екінші рет қайта жұқ­тырған 32 жағдай тіркелді. Вакцина салдыр­ғаннан кейін де КВИ жұқтырғандар анықта­лып жатыр. Айта кетелік, Алматыда «британдық», «үнділік», «бразилиялық», «даниялық» және «вьетнамдық» штамдарға зерттеу жүргізі­ліп жатыр. Сондай-ақ спикер бес штамм бо­йынша Алматыда қазірдің өзінде 31 зерттеу жүргізілгенін айтты. Қалада СОVID-19 штамдарын анықтаудың жаңа жедел ПТР-скринингі әдістемесі енгізілген.
«Елімізде штамдарды бақылау жүйесі бар, оған қоса мониторинг жүргізіп келеміз. Наурыз айының соңында Алматыда коронавирус­тың «британдық» штамм айналымының 77%-ы анық­талып, мамыр айының соңында бұл көр­сеткіш 84%-ға дейін өскен еді. Осы аптада біз «бри­тандық», «үнді», «бразилиялық», «да­ниялық» және «вьетнамдық» штамдар бойынша жұмыс істей бастадық», – деді Ж.Бекшин.
Алматының бас санитарлық дәрігерінің айтуынша, бұл штамдар аса жұқпалы әрі ауру өте ауыр өтеді. Соңғы күндерге дейін мегаполисте «британдық» штамды жұқтыру жоғары болды, қала тұрғындары «уханьға» қарағанда осы штамды екі есе жиі жұқтырады. Бірақ бұл жағдайды «үнді» штамы өзгертіп жіберуі әбден мүмкін. Бұл ақпараттар қаладағы эпидемиялық жағдайға дұрыс әрі жедел назар аударуға, дәрі-дәрмек қорын құруға, эпидемияға қарсы іс-шаралар жүргізуге мүмкіндік береді. Жаңа штамдар туралы баяндай отырып, Алматының бас санитары «Дельтаның» белгісі суық тиюге ұқсас деді.
«Бұл штамды көбінесе жастар жұқтырады. Басты симптомы – бас ауруы, тұмау, ангина, жоғары температура. Әдетте иіс сезу жоғал­майды және жөтел болмайды», деді Ж.Бекшин. – Сондай-ақ «Дельта» іш ауруын, құсу, тыныс жолының тарылуын шақырады.
Қайталап айтуға тура келеді, «Дельта» шта­мы бұрынғы штамдарға қарағанда 60%-ға жұқпалы. Орташа алғанда, бір адамнан 5-6 адам жұқтырады, ал айналымдағы штамдардан 3-4 адамға жұғады. Штамның инкубациялық кезеңі – жеті күн. Ғалым­дар­дың зерттеулері коронавирустың үнді штамынан ауруханаға жатқызу мен өлім-жітім­нің ықтималдылығы жо­ғары екенін айт­ты. Және «үнді» штамының симптомдары басқа, үйреншікті штамдардан өзгешелігі бар. Қысқасы, ахуал мың құбы­лып тұрғанда, эпидемиологтер не дейді? Меди­цина сала­сындағы белгілі тұлғалар әлі де бол­са біз­дің коронавирусқа деген қарым-қаты­насы­мыз­дың дұрыс еместігін алға тартуда.
Бәріміздің де ойымыз – біреу. Тағы да шыдаңқырап, осы кезеңнен аман өтсек болды. Пандемия да аяқталады. «Коронавирус» деген жауды жер жастандырамыз да, «інімізден» шығып, бұрынғыдай емін-еркін өмір сүре береміз. Ал зерттеушілер коронавирустың соңымыздан енді қалмайтынын, тұмау сияқ­ты тіршілігімізде ілесіп жүре беретінін, эко­­логиялық орнына жайғасып жатқанын айтып-ақ отыр. Бірақ мұны мойындағымыз да, есті­гіміз де келмейді.
Ауызбіршілікпен, ұйымшылдықпен, хал­қымыз түсіністік танытып, 70 пайыз егіліп, ұжымдық иммунитетке қол жеткіземіз деу де екіұдай факт. Ресейлік танымал доктор Мяс­никовтің айтуынша, ұжымдық иммуни­тет деген қар адамы сияқты, не бар, не жоқ. Автоматты түрде адамдардың белгілі бір бө­лі­гіне екпе салу індеттің жұғу тізбегін үзуге ке­пілдік бере алмайды. Оның пікіріне сүйенсек, екпе алған адамдар жұқтыруы да, жұқтыр­мауы да симптомсыз ауыруы да мүмкін, бірақ ауыр асқынулар болмайды және осы індет­тен өлмейміз.
Ал ғалымдар вакцина алғаннан кейін де індет жұқтырып алған 30 мыңдай адамды ба­қылаған кезде, олардың арасында қай­тыс болған бірде бір жан болмаған және ауыр жағдайға душар болмаған. Плацебо алғандар тобында – оң нәтиже көрсеткен тестілер көп болып, дерті ауыр өткен пациент­тер жиі кездескен және бір адам қайтыс болған. Дәрігерлердің айтуынша, вирус өте жылдам мутацияланып жатыр. Адамдардың ағзалары да әртүрлі, әркімге әртүрлі әсер етеді. Біреулер үйінен шықпай-ақ жұқтыруы мүмкін, енді біреулер ауру адамға барып мұрнымен үйкелессе де жұқпайды. Өйткені біздің генетикамыз басқа, иммунитетіміз үйлеспейді. Коронавирус қана емес, вакциналарды да әртүрлі қабылдаймыз.

АЛМАТЫ

Соңғы жаңалықтар

Бір облыс «қызыл» аймақта тұр

Коронавирус • Кеше

Ұлы дала мұралары

Елорда • Кеше

Екі жүлде – «егемендіктерде»

Егемен Қазақстан • Кеше

Тбилисиде топ жарды

Спорт • Кеше

Кардинг шабуылы

Қоғам • Кеше

Ұқсас жаңалықтар