«Отанға барар жол» қандай?

Бүгінде әлемде Қазақстанның азамат­тығын алмаған, бірақ ұлты қазақ 5 млн-ға жуық қандасымыз бар. Олардың көбі Қазақстан университеттерінде жоғары білім алғысы келеді. Халықаралық білім беру корпорациясының бірінші проректоры Қайыржан Меңдіғалиев оқу орнына call-орталығына, мессенджерлер мен әлеуметтік желі беттеріне шетел­дік қандас-талапкерлерден мемлекеттік гранттарға қатысты көптеген сауал келіп түс­кенін айтты.
«Білім және ғылым министрлігі жыл сайын еліміздің жоғары оқу орында­рында жоғары білім алу үшін 50 мыңнан аса грант бөледі. Бұл ретте, Қазақстан азаматтары емес, ұлты қазақ адамдар да мемлекеттік гранттар конкурсына қатыса алуы үшін жақсы жағдайлар жасалуда. Грант алу үшін ҰБТ тапсыру қажет. Кейбір тапсырмалар еліміздің мектеп пәндерінен алынған. Мысалы, Қазақстан тарихы немесе Қазақстан географиясы. Осыған байланысты Бі­лім және ғылым министрлігі Қазақ­стан Республикасы­ның азаматтары емес, ұлты қазақ адам­дар үшін 4% квота бөледі. Бірақ біраз адам өту үшін қа­жетті ұпайын жинай алмаймын деп қорқады. Сондықтан Айғазы Құса­йы­нов бастаған халықаралық білім беру корпорациясының Бақылау кеңесі 20 ішкі грант бөлді. «Отанға барар жол» бай­қауының жеңімпаздары біздің есе­бі­мізден оқығанын қалаймыз», деді Қ.Мең­діғалиев.
Байқау бірнеше кезеңнен тұрады жә­не онлайн форматта өтеді. Негізгі ке­­зеңде қатысушылар әлеуметтік желі­де жа­рияланатын «Қазақ халқының та­ри­­хын­дағы көрнекті тұлғалар» және «Мен неге Ха­­лық­­аралық білім беру кор­порациясына түскім келеді?» тақырып­та­рында бейне-эссе дайындауы тиіс. Бай­қау қорытындысы 26 шілдеде шы­ға­­ры­лады. Финалда қатысушылар он­­лайн-әңгімелесуден өтеді. Байқау же-­
ңім­­паздары Халықаралық білім беру корпо­рациясында – ҚазБСҚА және ҚАУ жоғары оқу орындарында оқу­ға 20 ішкі грант алады.
Халықаралық білім беру корпорация­сының ректоры Маргарита Имандосова шетелдік студенттердің қазақстандық жағдайларға жылдам бейімделуі үшін кешенді жұмыс жүргізілу керек екенін, мұндай бағытта оқу орнының тәжірибесі жеткілікті екенін жеткізді.
«Бұл бағыттағы тәжірибеміз мол. Бұ­рынғы оқу орындарында да шетелдік студенттер оқыған. Қазіргі ұтқырлық бағдарламасы бойынша да студенттер келіп оқиды. Бүгінде ЖОО-да 69 шетел азаматы білім алуда. Студенттер тарапынан туындаған мәселелерді уақтылы әрі жедел шешуге мүмкіндігіміз бар. Бұл үшін арнайы бөлімдер (Халықаралық кеңсе мен Әлеуметтік даму департаменті) ашылды. Осы бөлімдердің қызметкерлері студенттердің мәселелерін шешіп беруге әрдайым дайын», деді М.Имандосова.
Халықаралық білім беру корпорация­сы Қазақстанның өзге де жоғары оқу орындарын үлгі алуға және бастаманы қолдауға шақырды.
«Егер болашақта 129 ЖОО-ның әр­қай­­сысы 1 гранттан бөлсе, сәйкесінше 129 та­лапкер өз отбасыларымен бірге ту­ған же­рінде өз болашағын табуға мүм­­­кіндік алады. Дәл осындай қа­дам­­дар Қазақстанда қазақ хал­қы­­ның ұлт­тық жаң­ғыруына алып ке­леді», деді Халық­аралық білім беру кор­по­ра­циясының бірінші проректоры Қ.Мең­діғалиев.
Қоса кетейік, Халықаралық білім беру корпорациясы (ХБК) 2007 жылы Елба­сы Нұрсұлтан Назарбаевтың еліміздегі білім беру саласының сапасын көтеру және университеттер әлеуетін арттыру бағытында жүргізген саясаты негізін­де Қазақ бас сәулет-құрылыс академия­сы (ҚазБСҚА) мен Қазақ-Америка универ­си­тетін (ҚАУ) біріктіріп құрылған болатын.