Аймақтар • 13 Шілде, 2021

Ауыл әкімдігінен үміткерлер аз емес

862 рет
көрсетілді
4 мин
оқу үшін

Түркістан облысында 181 ауылдық округ болса, биылғы ауыл әкімдерін сайлау 63 ауылдық округтің 264 сайлау учаскесінде өткізілетін болады. Шілдеде алдымен 60 ауылдық округ тұрғындары өз таңдауын жасайды.

Ауыл әкімдігінен үміткерлер аз емес

Облыстық сайлау комис­сиясының төрағасы Әлібек Өмірәлиев апта соңына дейін ауыл әкімдігіне 230 үміт­кер тіркелгенін мәлім етті. Оның 76-сы саяси партиялар ұсынған үміткер болса, 154-і – өзін өзі ұсынған.

Саяси партиялар мен жеке азаматтардың өзін өзі ұсы­нуы бойынша үміт­кер­лердің тіркелуі 14 шілдеге дейін жалғасатынын ескерсек, бұл сан өсе түсері анық. Ауылдың ахуалын жақсарта түсу мақсатында нақты бағ­дарламасы бар азаматтар үміт­кер ретінде додаға тү­суге бел байлап отыр деген се­нім тұрғысынан айтсақ, әкім болғысы келетіндердің көптігі қуантады, әрине. Ал сайлаушылар – ауыл тұр­­­ғындары білімді, саналы, елдің қамын ойлайтын аза­мат­тарды таңдап, сайлайтын кез келгенін айтып жатыр.

«Мемлекет басшысы Қасым-Жомарт Тоқаев «Жаңа жағдайдағы Қазақ­стан: іс-қимыл кезеңі» Жол­дауында ауыл әкімдерін тікелей сайлауды енгізу қа­жеттігі жө­нінде бас­тама кө­тергені мәлім. Сондай-ақ Президент ауыл әкімдерін сайлау мәсе­лелері жөнінде кеңесте бір­қатар міндет жүк­теді. Ел тарихындағы ай­тулы белес деп айтуға бола­тын тарихи маңызы бар саяси науқан – біз үшін стра­тегиялық мәні айрықша міндет. Тұңғыш рет азаматтарымыз жергілікті атқарушы биліктің басшысын тікелей сайлау мүмкіндігіне ие бол­мақ. Мемлекет басшысы Қазақстан халқының 40 па­йыздан астамы ауылда тұ­ратынына тоқталып, бұл саяси шара, ең алдымен, ауыл тұрғындарының мүддесі үшін жасалып жатқанын жет­кізгенін білесіздер. Бұл сай­лауда қолынан іс келетін, нағыз абыройлы азаматтар сайланса дейміз. Ауыл әкімі – тек креслода отыратын адам емес. Ол бүкіл тұрғынның мә­селесін жүгіріп жүріп ше­шетін өте жауапты, жанашыр азамат болуы керек», деді облыс әкімі Өмірзақ Шө­кеев Мақтаарал, Шардара және Жетісай аудандарының ақ­сақалдарымен кездесуде.

Елді мекендердегі мұн­дай саяси дода 2013 жылы басталғаны мәлім. Төрт жыл­дан кейін, яғни 2017 жылы тамызда 14 облыстағы аудандық маңызы бар қа­лалар, ауылдық округтер, ауылдық округтің құ­рамына кірмейтін кенттер мен ауыл­дар әкімдері жер­гілікті мәслихаттар арқы­лы сайланған. Кешегі Оң­түс­тік Қазақстан, бүгінгі Түр­кіс­тан облысының ауылдарында сайланған әкім­дердің бірқатары әлі күнге дейін ауылдастарының сенімінен шығып, абыройлы қызмет атқаруда. Мысалы, Төлеби ауданы Киелітас ауылдық окру­гінің әкімі, Келес ауда­нында 3 ауылдық округ әкімі, Сары­ағаш ауданында 1 кент, 7 ауылдық округі әкімдері 2013 жылдан бері абыроймен қызмет етіп жүр. Дегенмен түрлі себептермен, соның ішінде құқық­бұзушылыққа жол беріп, қыз­метінен босатылған әкімдер де аз емес.

Облыстық сайлау комис­сия­сының мәліметіне қара­ғанда, өңір аумағында жыл сайын ауыл округтерінің әкім­дері сайланып отырған. Нақтырақ айтсақ, 2017 жы­лы кезекті саяси додада 119 ауыл әкімі төрт жыл мер­зімге сайланған. Ал 2018 жы­лы – 35, 2019 жылы – 45, 2020 жылы  49 ауыл әкімі сайланған. Яғни сайлау өткізуде тәжірибе бар, бірақ бұл жолғы сайлаудың жөні бөлектеу. Жергілікті тұр­ғындар атқарушы билік­тің басшысын тікелей сайлау мүмкіндігіне ие болмақ. Сайлаушылар ауыл әкімі бо­луға бел буған бүгінгі үміткерлер мұндай сенімге ие болу үлкен мәртебе және қиын да күрделі міндетті мін­сіз атқарып, ауылдастарына адал қызмет ету зор жауап­кершілік жүктейтінін жақсы біледі деген ойда.

 

Түркістан облысы