Науқастар саны, әсіресе, Атырау қаласында көбейіп тұр. Бір күнде шаһарда 280 науқастың тіркелуі алаңдатпай қоймайды. Бұған қоса Теңіз кенішінде 10 науқас тіркелді. Сондай-ақ өңірдегі жеті ауданның бәрінде қауіпті вирустың «қақпанына» түскендер табылып отыр. Нақтылай айтқанда, Құрманғазы ауданында – 17, Жылыойда – 11, Индерде – 6, Мақатта – 4, Исатайда – 2, Махамбетте – 2, Қызылқоға ауданында 2 адамнан коронавирус инфекциясының белгісі анықталды.
Осыған байланысты инфекциялық стационарларға жатқызылған науқастар саны да арта бастады. Қазір 806 адам емделіп жатыр. Оның ішінде модульдік ауруханада – 188, аудандардағы стационарларда – 188, №2 облыстық ауруханада – 150, кардиологиялық орталықта – 108, фтизиопульманологиялық орталықта – 103 науқас ем алуда. Теңіз кен орнындағы инфекциялық стационарда 69 адам емделіп жатыр. Ал үй жағдайында 1 080 пациент ем-дом алуды жалғастыруда.
– Атырауда науқастардың дені ПТР-тест жүргізілетін зертханаларда жасалған қорытындының нәтижесімен анықталып отыр. Қазір өңірде коронавирус инфекциясына қарсы зерттеу жүргізілетін 14 ПТР-тест зертханасы жұмыс істейді. Бұл зертханаларда тәулігіне 14 мыңнан аса зерттеу жүргізіледі. Елімізде коронавирус инфекциясы тіркелген былтырғы наурыздан бері өңірде жүргізілген ПТР-тест саны 1 млн 292 мыңды құрады, – дейді А.Байдуәлиев.
Оның мәліметіне қарағанда, қауіпті вирустың таралу көрсеткішінің өсуіне байланысты 520 резервтік төсектік орын дайындалыпты. Оның ішінде 20 төсектік орын жансақтау бөліміне бөлініп отыр. Карантиндік стационар үшін 408 төсектік орын ашылған.
– Коронавирус инфекциясына шалдыққан науқастар саны күрт өсетін болса, тағы бірнеше ауруханадан инфекциялық стационар ашуды көздеп отырмыз. Нақтылай айтқанда, облыстық ауруханада – 50, темір жол ауруханасында – 120, Махамбет ауданындағы фтизиопульмонологиялық орталықта – 150, сондай-ақ жатақхананың бірінде 200 орындық инфекциялық стационар ашылады. Қазір 2 428 орындық инфекциялық стационарларда 806 науқас емделу үшін оқшауланды. Стационарлардағы жүктеме – 33,2 пайыз. Жансақтау бөлімінде 108 орын бар. Қазір бұл бөлімде жағдайы ауыр 53 науқас жатыр. Науқастардың жетеуі өкпені жасанды желдету аппаратына қосылған. Мұндағы жүктеме 49 пайызды құрап отыр, – дейді А.Байдуәлиев.
Облыстық жұмыспен қамту және әлеуметтік бағдарламалар басқармасы мамандарының айтуынша, мемлекеттік атаулы әлеуметтік көмек алатын отбасыларға медициналық алғашқы көмек жиынтығы таратылып жатыр. Мақсат – коронавирус инфекциясының таралуының алдын алу.
– Медициналық алғашқы көмек жиынтығының құрамын Денсаулық сақтау министрлігі бекіткен. Соған сәйкес, 952 медициналық қорғау құралдары қобдишасын Атырау қаласы мен аудандарда тұратын отбасыларға таратуды көздедік. Медициналық қорғау құралдары жиынтығына цифрлы термометр, 100 дана медициналық маска, 2 дана қолға арналған антисептик, ибопрофен (400 мг, 20 таблетка), парацетамол (500 мг, 20 таблетка) салынған, – деп хабарлады басқарма мамандары.
Дәрігерлер қауіпті вирустың таралуын тежеу үшін вакцина алудың қажеттігін әлі де айтып жатыр. Тіпті вакцина алушыларды ынталандырудың түрлі шарасы қолға алынып жатыр. Мәселен, облыстық «Азаматтық Альянс» ЗТБ ұйымдастырған ақшалай ұтыс ойыны әр он күн сайын 30 қыркүйекке дейін вакцина алғандар арасында ойнатыла бастады. Ақшалай ұтыстың алғашқы ойыны 11 шілдеде тікелей эфирде өтті. Тәуелсіз бақылаушылардың қатысуымен кездейсоқ сандарды таңдау арқылы 10 сертификаттың иесі анықталды. Олардың әрқайсысына 200 мың теңгенің сертификаты тапсырылды.
Енді осындай ұтыс ойынын «Байзар» сауда-ойын сауық орталығы да қолға алды. Бас жүлде –
1 млн теңге. Ұтыс ойынына 1 шілде – 1 қыркүйек аралығында вакцина алған тұрғындар қатысады.
Мұндай ынталандыру шараларынан соң өңірде күн сайын вакцина алушылар қатары арта бастағаны байқалады. Облыстық денсаулық сақтау басқармасының дерегіне сүйенсек, 12 шілдеде 3 183 адам вакцина салдырған. Осылайша, 1 ақпаннан бері 118 201 атыраулық Спутник V, QazVac, Hayat-Vax вакциналарының бірінші компонентін ектірді. Вакциналардың екінші компонентін алғандар саны 62 535 адамға жетіп отыр.
Атырау облысы
