Шілденің шіліңгір ыстығында кешкілік достарымен бірге Қарғалы өзенінің жағасында серуендеп жүрген 20 жастағы Мұхтар оқиғаға тап болды. Өзен жағасында бір топ адамның спирттік ішімдіктер ішіп отырғанын көреді. Сол жерде топтанып масаң күйде отырған ер адамдардың бірі суға шомылмақ болады. Бейтаныс суға түсуге бара жатып, Мұхтар мен достарынан жағада отырғандарды сырттай бақылап қоюды өтінген екен. Алайда олардан таяқтастам жерде отырған Мұхтар көзінің қиығымен ішімдік ішкендерді емес, суға сүңгіген жігітті бағып отырған. Бейтаныстың су бетіне қайтып шықпай қалғанын байқаған ол ойланбастан көмекке ұмтылады. Бірер минут ішінде Қарғалы өзенінің 4 метр тереңдігінен батып бара жатқан жігітті алып шықты. Сөйтіп қас-қағым уақыт ішінде 20 жастағы Мұхтар өзінен 8 жас ересек жігіттің өмірін құтқарып қалды. Қарғалы өзенінің бойындағы шомылуға тыйым салынған жерде ішімдік ішкендердің «саяхаты» осылайша қайғылы аяқтала жаздады.
Мұхтар сол жерде достарымен бірге ессіз жатқан адамға жедел жәрдем келгенше алғашқы медициналық көмек көрсетіп үлгерді. Студенттер науқасты жасанды дем алдырып, жүрек тұсын уқалады. Көп кешікпей келіп жеткен дәрігерлерге құтқарылған, бірақ ауыр күйде жатқан науқасты тапсырғаннан кейін олардың иықтарынан ауыр жүк түскендей болды. Шомылуға рұқсат етілмеген жерде мас күйінде суға түскен ер адам жедел жәрдем ауруханасының жансақтау бөліміне ауыр халде жеткізіліп, біраз күннен кейін ғана есін жиды.
Батыл студент шілденің басында болған осы жағдайды ұмытып кетсе де, Төтенше жағдайлар департаментінің басшылығы ұмытпай, Мұхтар Түлкібаевты ведомстволық наградамен марапаттау туралы министрлікке өтініш жолдады.
Ақтөбе облысы
