Бұл – бір жағынан ауыл халқына өз тағдырын өзі айқындауға берілген мүмкіндік болса, екінші жағынан – үлкен жауапкершілік.
«Бұрын ауылдағы мәселені неге әкімге айтпайсыз дегенде оның жоғарыдан тапсырма болмаса, халықтың талабына құлақ аспайтынын алға тартатынсыздар. Ал бұдан былай әкімді өздеріңіз сайлап аласыздар. Енді әкім жұмыс істемей жатса, өзгеден көре алмайсыздар. Өйткені өздеріңіз дауыс бергенсіздер. Оның жұмыс істеуін жай тұрғын ретінде ғана емес, дауыс беруші ретінде талап ете аласыздар», деп түсіндірдім.
Иә, ауылда сайлау өтіп, халықтың саяси белсенділігі оянса, ондағы тіршілік те жанданады. «Жергілікті өзін-өзі басқару жүйесіне өзгеріс енгізу талпынысын ауылға деген қамқорлықтың шынайы қадамы деп қарастыруға да болады. Ал сайлаудан кейін ауылдарда тіршіліктің жақсы немесе жаман жағына өзгеруі нақты сайланған әкімдерге байланысты болады деп есептеймін. Ілгері кеткендері дұрыс таңдау жасағанын түсінсе, жағдайы оңалмаған елді мекендердің халқы сайлауды сәтті өткізген ауылдардан келесі жолы үлгі алатын болады. Өйткені бір әкімді сайлаған соң бірнеше жыл соның құзырында болу керек деген талап жоқ. Халыққа сайланған әкімнің қызметіне лайықтылығын дауысқа салу құқығы да беріліп отыр. «Көш жүре түзеледі» демекші, бұл істе әсте асығуға болмайды. Өйткені біздің таңдаған жолымыз – революциялық өзгеріс емес, эволюциялық даму.
«Ауыл» демократиялық партиясынан 703 орынға барлығы 104 кандидат қатысты. Үміткерлердің орташа жасы 35-45 аралығында, 11-і – әйел. Сайлау нәтижелері жақын күнде белгілі болады. Жеңіске ауылдың тыныс-тіршілігі мен қордаланған мәселелерімен жақсы таныс, соны шешуде аянбай қызмет ететін үміткерлер жетсін дейміз.
Төлеутай РАХЫМБЕКОВ,
«Ауыл» Халықтық-демократиялық партиясы төрағасының бірінші орынбасары
