Аймақ басшысы өңірде вирустың тіркелуі тәулігіне 100-ден асып отырғанын айтып, сақтық шараларын қатаңдатуды тапсырды.
– Республиканың өзге аймақтары секілді біздің облыста да «Дельта», «Дельта плюс» штамдары тіркеліп, жедел тарап отырғанын көріп отырмыз. Жағдай өте ауыр. Былтыр дәл осы уақытта облысымызда коронавирус инфекциясынан өлім-жітім көп болғаны белгілі. Енді биыл әр жерде жылдық астар өткізу жиілеп отырғаны жөнінде мәліметтер түсіп жатыр. Той өткізетіндер де толастар емес. Күні кеше ғана Қызылорда қаласында орналасқан екі мейрамханада отбасылық шаралар ұйымдастырылған. Бірақ бұл мониторингтік топтардың назарынан тыс қалып отыр. Дәл осындай жағдай аудандарда да кездесуде. Сондықтан мониторингтік топтардың жұмысын ширатқан жөн, – деді облыс әкімі.
Облыстағы эпидемиялық жағдай туралы баяндама жасаған Санитарлық-эпидемиялық қадағалау департаментінің басшысы Динара Жаңабергенова наурыз айындағы мерекелік күндерден кейін ауру санының күрт көбейіп кеткенін айтып өтті. Департамент басшысының айтуынша, ұжымдық вакцина алғандар арасында аурушаңдық деңгейі төмендеп келе жатыр. Ал облыс орталығында індет жұқтырғандардың күрт көбеюіне байланысты Қызылорда қаласы үшін жаңа қаулы қабылданып, күшейтілген сақтық шаралары енгізіліп отыр.
Штаб отырысында облыстық полиция департаментінің бастығы Бектөре Сұлтан өңірдегі мониторингтік топтардың жұмысын күшейту бағытындағы ұсынысын айтса, облыстық денсаулық сақтау басқармасының басшысы Сәбит Пазылов ауруханалардағы төсектік орындармен қамту және жаппай вакциналау жұмыстары барысын баяндады.
Жүктеменің артуына байланысты инфекциялық төсектік орындар саны 3 есеге ұлғайып, 1 820-ға жеткен. Қажетілікке қарай инфекциялық және провизорлық стационарларда төсектік орынды 3 200-ге дейін көбейтуге мүмкіндік бар. Үй жағдайында ем алатын азаматтар үшін 138 дәрігерлік мобильдік топ құрылған. Топ құрамындағы дәрігерлердің науқастарға шұғыл түрде жетуі үшін облыс әкімдігі мен қала әкімдігі тарапынан қосымша көліктер қарастырылды. Облыста вакцина салынуға тиіс 401 мың тұрғынның 53,2 пайызы екпе алған.
– Күнделікті 150-160-қа жуық індет тіркеліп, 100-ге жуық науқас стационарға ем алуға жатқызылуда. Бұл, әрине, стационар жүктемесінің артуына әкеліп соғады. Ауыр жағдайдағы науқастардың көбейгені де бізді алаңдатып отыр, – деді басқарма басшысы.
Жиында Гүлшара Әбдіқалықова керекті дәрілердің ауылдар мен қала шетіндегі дәріханаларға уақтылы және қажетті мөлшерде тұрақты түрде жеткізілуін қадағалауды тапсырды. Отырыста облыстық кәсіпкерлік және туризм басқармасы басшысы Фердоуси Қожабергенов Ashyq жобасына кәсіпкерлердің қатысуы туралы баяндады. Бүгінде өңірдегі 252 нысан Ashyq-қа енген.
Облыс әкімі қоғамдық тамақтану мен сервистік қызмет орындарында қауіпсіздікті сақтау үшін кәсіпкерлік нысандар Ashyq жобасына белсене қатысуы қажеттігін еске салып, бұл бағытта тиісті сала басшыларына жұмысты қысқа мерзім ішінде үйлестіруді жүктеді.
Жиын соңында аймақ басшысы облыстық санитарлық-эпидемиялық бақылау департаментіне науқастармен қарым-қатынаста болған тұрғындарды шұғыл түрде анықтап, аурудың таралуына жол бермеуді, полиция департаменті, Қызылорда қаласы және аудан әкімдіктерімен бірлесіп, күнделікті мониторинг топтарының жұмысын күшейтуді міндеттеді.
– Қазіргі таңда вакциналау мәселесіне басты назар аударылуы тиіс, өйткені ауруды жұқтырмаудың бұдан басқа жолы жоқ. Мұнан бөлек, төсектік орынмен қамту мен жансақтау бөлімдерінің дайындығы да аса маңызды. Сондай-ақ үйде емделіп жатқан науқастардың толыққанды ем алуын қамтамасыз ету қажет. Жағдайын ушықтырып алмас үшін олардың жағдайын күнделікті қадағалауды тапсырамын. Барлық жұмыс ұйымдасқан түрде жүргізіліп, тұрақты бақылауда болсын, – деді облыс әкімі.
Қызылорда
