Өткен апта соңында медициналық мекемелер індеттің таралуын тоқтатып, жұқтырудың алдын алу бағытындағы даярлығын пысықтау үшін облыс әкімі Гүлшара Әбдіқалықова жаңадан ашылған модульді жұқпалы ауруханаға барды. Коронавируспен күресіп жүрген дәрігерлермен пікірлесіп, жансақтау бөлімінде жатқан азаматтардың жағдайын білді.
Үкіметтің қолдауымен 200 төсек-орынға арналған модульдік стационар өткен аптадан бастап науқастарды қабылдай бастады. Жаңа емдеу мекемесінде науқастарға қажетті дәрі-дәрмек толық жеткілікті, мамандардың жұмыс режімі жолға қойылған.
Облыс әкімі ем алушылармен әңгіме барысында соңғы күндері вирустың жаңа штамдарының пайда болуы себепті індеттен сақтану амалдарына жете мән беруді, қорғанудың төте жолы вакцина алуға шақырды.
– Коронавируспен күреске облыстық медициналық ұйымдар толығымен дайын. Дәрі-дәрмек қоры, медициналық құрал-жабдықтар жеткілікті. Бірақ вирустың жаңа штамдары жылдам таралып, түрлі өзгеріске түсіп жатқаны бәрімізді алаңдатып отыр. Кеше ғана АҚШ-тың Нью-Йорк қаласында жаңадан «Йота» штамы білінді. Осыған байланысты вакциналау жұмыстарын қарқынды түрде күшейтуіміз керек. Той-жиын мен дәстүрлі шаралардан тыйылып, дертті жұқтырып алмаудың амалын жасауымыз керек. Балалардың қауіпсіздігі, жақындарымыздың саулығы үшін облыс тұрғындарын екпе алуға шақырамын. Әрбіріміз жауапкершілікті сезінсек, қай қиындықтың да құрсауынан аман шығарымызға сенімдімін, – деді облыс әкімі.
Аймақта маусым-шілде айларында инфекциялық төсек-орын саны 585-тен 2 340-қа дейін, ал реанимациялық төсек-орын 90-нан 172-ге дейін көбейтіліп, қазір жүктеме 55 пайызды құрап отыр. Резервтік төсек-орын санын қосқанда 3 200 төсек-орын әзірленді.
Облыс әкімі денсаулық сақтау басқармасының басшысы Сәбит Пазыловқа вирустың таралу деңгейін тұрақты бақылауға алып, алгоритмге сәйкес қажетті шараларды дер кезінде қабылдауды тапсырды. Осы жұмыстармен қатар, тұрғындарды вакцина алуға шақыру, індеттің таралуын тек екпе ғана тоқтататынын насихаттау бір сәтке де бәсеңдемеуі керектігін атап айтты.
Қызылорда
