Түркістан қалалық Полиция басқармасының оқшаулағышына қамалған күдіктіге қатысты түпкілікті үкімді оның кінәсінің дәрежесін анықтай отырып, сот шығарады.
Дегенмен Түркістан облысында сыбайлас жемқорлық әрекетіне көбінесе тұрғын үй қатынасы саласының мамандары барады екен.
«Биыл 7 айдың ішінде облыста 57 жемқорлық қылмыс тіркелді. Олардың ішінде 21 парақорлық, 4 алаяқтық және 18 жымқыру әрекеті бар. Облыста сыбайлас жемқорлық әрекетінен көш бастап тұрған сала – тұрғын үй қатынасы. Ол бойынша 12 қылмыс, екінші орында полиция органдары – 9, одан әрі білім саласы – 8, әлеуметтік қызмет – 7, жер қатынастары – 6 және құрылыс саласында 5 қылмыс тіркеліп отыр. Әрине, барлық жемқорлық әрекеттер бойынша соталды тергеу жұмыстары жүріп, әр істің ақ-қарасы қаралды. Сонымен қатар жемқорлық әрекет орын алған ұжыммен түсіндіру жұмысы өткізіледі. Ондағы мақсат – сыбайлас жемқорлық әрекетін ендігі уақытта болдырмау», дейді Сыбайлас жемқорлыққа қарсы іс-қимыл агенттігі Түркістан облысы бойынша департаментінің басшысы Хәкім Көшқалиев.
Жемқорлықтың алдын алу мақсатында халық арасында түсіндіру жұмыстары жиі ұйымдастырылуда. Жыл басынан бері департамент басшысы 43 азаматты түрлі сұрақтар бойынша қабылдаған. «Биылдың 7 айында мыңнан аса түрлі арыз-шағым келіп түсті. Күніне азаматтардан 6-7 шағым түсіп жатады. Әрине, өз кезегімізде «Халық үніне құлақ асатын мемлекет» тұжырымдамасына сай, тиісті жауапты шұғыл түрде беруге тырысамыз», дейді департамент басшысы.
Биыл жыл басынан бері 870 мыңнан астам адамды қамтыған 675 сыбайлас жемқорлықтың алдын алу шарасы ұйымдастырылған. Сонымен қатар 264 кездесу өткізіліп, 333 тікелей эфирден жемқорлық мәселесі талқыланған. Сол сияқты парақорлықтан аулақ болуға шақыратын 9 бейнеролик түсіріліп, насихатталған. Сыбайлас жемқорлықтың алдын алуда өңір азаматтары да белсенді. Мысалы, парақорлық әрекет туралы хабарлаған 8 тұлғаға 1,5 млн теңгенің сыйақысы берілген. Сонымен қатар Call орталығына 71 адам хабарласыпты. Белсенді азаматтардың хабары мен департамент қызметкерлерінің жедел әрекетінің нәтижесінде 3 азаматтың үстінен заңсыз әрекеті үшін қылмыстық іс қозғалып, 2 лауазымды тұлға жауапқа тартылды.
Жыл басынан бері сыбайлас жемқорлық әрекетіне жол берген түркістандық 17 мемлекеттік қызметші сотталған. «Биыл облыста сыбайлас жемқорлық әрекетіне барған 19 азаматқа қатысты 16 қылмыстық іс сотқа жіберілді. Одан бөлек біз 70 қылмыстық істі тоқтату туралы шешім қабылдадық. Сонымен қатар жыл басынан бері облыста сыбайлас жемқорлық әрекетін жасаған 22 адам сотталды. Оның 17-і мемлекеттік қызметші, қалған 5-уі құқық қорғау органы қызметкерлері. Биыл облыс бойынша 6 тұлға қарамағындағы қызметкері сыбайлас жемқорлық әрекетіне барғаны үшін жауапқа тартылды», дейді Х.Көшқалиев. Бүгінде өңірде кәсіпкерлер мен инвесторларды сыбайлас жемқорлықтан 100% қорғауды қамтамасыз ету мақсатында Protecting Business and Invesments жобасы сәтті жүзеге асырылуда. Жоба аясында жалпы сомасы 665 млрд 565 млн теңге болатын 70 ірі инвестор мен кәсіпкерлер департамент тарапынан сыбайлас жемқорлыққа қарсы сүйемелдеуге алынған. Бизнесті қорғау шеңберінде кәсіптік субъект өкілдерінен күні бүгінге дейін 70 шағым мен өтініш келіп түскен. Олар толық қанағаттандырылып, заңды құқықтары қалпына келтіріліпті.
Сондай-ақ департамент басшысы мемлекеттік органдар лауазымды тұлғаларының шағын және орта кәсіпкерлік бизнесіне заңсыз араласу әрекеттерінің 11 дерегі анықталғанын мәлім етті. Лауазымды адамдардың кәсiпкерлiк қызметке заңсыз араласуы бойынша 2 әкімшілік құқық бұзушылық ісі тіркеліп, бөлім басшыларына 100 АЕК көлемінде айыппұл салынған. Ал «Мемлекеттік сатып алудың бірыңғай терезесі» ақпараттық-талдау жүйесі арқылы сатып алу саласына жүргізілген мониторингтік жұмыстардың нәтижесінде, биылдың 7 айында 506 679 999 теңге үнемделген.
Түркістан облысы