Қарағанды хайуанаттар бағының айналасында тағы да жанжал шықты. Бұл жолы келушілер мүйізі кесіліп, қансыраған бұғылардың суреті мен видеосын жариялады. Ол әлеуметтік желілерде таралып, резонанс тудырды.
Желі қолданушыларының пікірі екіге бөлінген. Бірі жануарлар жағдайына алаңдайтынын айтып ашуланса, ал біреулері хайуанаттар бағының әкімшілігін қолдаған.
«Жануарлар лас жерде қансырап жатыр. Олар инфекция жұқтырмас үшін мүйізін таңуды да ойламаған. Осыны істегендерді ауруханада осылай емдесе ғой. Хайуанаттар бағы емес, жануарларды азаптайтын орын ғой мына жер», деп жазды желі қолданушылары.
«Неге сонша сауатсызсыңдар? Жануарлар наркоздан кейін әлсіреп жатқанын қарапайым көзбен көруге болады. Мүйіздері бір-біріне зақым келтірмес үшін кесіледі, өйткені қазір оларда рутинг маусымы басталды. Сондықтан бәрін қауіпсіздік үшін жасайды. Пікір жазар алдында неге бұлай жасағандарын оқысаңдаршы», деп жазады басқа желі қолданушысы.
Қарағандыдағы хайуанаттар бағы мән-жайды түсіндіріп, пікір білдірді. Саябақтың зоотехнигі бұғының мүйізін кесу процедурасы жыл сайын күзде жануарлардың қауіпсіздігі үшін жасалатынын айтты.
«Күзде бұғылар агрессивті бола бастайды. Көбінесе бұндай жағдайда ұрғашы бұғылар зардап шегеді. Жануарлар бір-бірін жарып жіберген кездер де болған. Сондықтан мұндай жағдайлар қайталанбас үшін жыл сайын мүйіздерін кесуге мәжбүрміз. Бұл жолы хайуанаттар бағына келушілер түсірген үш бұғының мүйізі кесілген. Сурет және видео түсірген кезде жануарлар әлі де ауырсынуды басатын дәрілер әсерінде болған. Сондықтан олар өте әлсіз болып көрінеді. Қазір олардың жағдайы қалыпты. Олардың мүйізі қанмен қоректенеді, ал кескеннен кейін табиғи түрде ағып кетеді», деді хайуанаттар бағының қызметкері.
