Аймақтар • 19 Қыркүйек, 2021

Түркістанда «Бұл - біздің таулар» фестивалі өтті

Түркістан Оқушылар сарайы мен «Turkistan Tourism Center» орталығы бірлесе «Бұл - біздің таулар» фестивалін ұйымдастырды, деп жазады Egemen.kz.

Egemen Qazaqstan

Бұл шараның мақсаты – оқушыларға аймақтағы таулы өлкелерді таныстыру, табиғат құндылықтарын насихаттау, тау туризмін дамыту және Түркістан облысының жаңа туристік бағыттарын таныстыру.

Фестивальға Түркістан қаласындағы 30 мектептен үздік, белсенді әрі талантты 30 оқушысы және «Оқушылар сарайындағы» үйірмелерге қатысушы, көптеген республикалық және халықаралық додаларда топ жарып жүрген дарынды 20 оқушы қатысты. Олар 18-19 қыркүйек күндері Сайрам-Өгем мемлекеттік ұлттық табиғи паркі және Хантағы демалыс аумағына саяхат жасап, түрлі қызықты сайыстар мен ойындар ойнап уақыт өткізді.

Алдымен Түркістан қаласынан жолға шыққан фестиваль қатысушылары Сайрам-Өгем мемлекеттік ұлттық табиғи паркіне барды. Онда оқушылар «Бұл - біздің таулар» тақырыбында сурет салудан сынға түсті. Одан кейін «Дрон ұшыру» бойынша балалар өздерінің қабілеттерін көрсетті. Сонымен қатар өнерден алыс емес балалар өлең, эссе жазып және ән айтып та таланттарын көрсетіп ұйымдастырушылардың жүлделеріне ие болды.

Екінші күні Хантағы демалыс аумағына барған балалар кедергілер арқылы тау шыңдарын бағындырды. Сондай-ақ пікірсайыс ұйымдастырып, өздерінің жан-жақтылықтарын көрсете білді.
Оқушылар сарайы директоры Индира Сарқытқызы: «Балаларды табиғатқа жиі алып бару, оларға қызықты сәттер сыйлау өте пайдалы. Мен өзім де тауға жиі шығамын. Адам табиғатпен тілдесу арқылы жаңа белестерге күш-қуат алады. Сонымен қатар, бүгінгі шара ең бірінші кезекте балаларды табиғатты аялауға үйретері сөзсіз» дейді.

Еске сала кетейік, аталмыш фестивалі 2001 жылдан бері өткізіліп келеді. Жыл сайын фестиваль қатысушылары арасында ішкі туризмді дамытуға қызығушылық пен табиғатты қорғауға деген құлшыныс артып келеді.