Іріктеу сыны аяқталып, негізгі жарыста жерлестеріміздің арасынан алғашқы болып кортқа 20 жастағы Тимофей Скатов шықты. Әлемдік рейтингте 280-орында тұрған ол Андреас Сеппимен сайысқа түсті. 37 жастағы Италия теннисшісінің есімі жанкүйерлерге жақсы таныс. АТР турнирлерін үш рет ұтқан Сеппи кезінде Уимблдон мен Ролан Гарростың төртінші кезеңінде өнер көрсеткен. Ал Аустралияның ашық біріншілігінде төрт рет дәл сол межеге дейін жетті. Осы табысының арқасында әлемнің 18-ракеткасы атанды. Қазіргі кезде Андреас үздіктер тізімінде 87-орынды иеленуде.
Десек те Тимофей азулы қарсыласынан еш қаймыққан жоқ. Әсіресе, алғашқы сеттегі ойыны керемет әсер қалдырды. Кездесу барысында 1:4 есебімен жеңіліп жатып, бәсекені тай-брейкке дейін жеткізді. Шешуші тұста ширақ қимылдаған Скатов жеңісті Сеппидің уысынан жұлып әкетті – 7:6. Екінші сетте Апеннин түбегінің түлегіне есе жіберді – 4:6. Десек те үшінші сетті Тимофейдің мысы басым болды – 6:1. Осылайша, Нұр-Сұлтандағы турнирде алғашқы сенсация тіркелді. Енді Скатов Беларусь елінің өкілі Илья Ивашкомен кездеседі.
Кеше Дмитрий Попко аустралиялық Джон Миллманмен шеберлік байқаса, бүгін Михаил Кукушкин жасыл құрлықтың тағы бір өкілі Джеймс Даквордпен күш сынасады. Алғашқысы әлемдік рейтингте 48-орында тұрса, екіншісі 65-сатыға жайғасты. Бірақ біздің жігіттер өз жанкүйерлерін жерге қаратпау үшін кортта барын салады деп ойлаймыз. Ал жарысты екінші айналымнан басталағалы отырған Қазақстанның бірінші ракеткасы Александр Бублик бүгін АТР тізімінде 60-орынды еншілеп отырған сербиялық Миомир Кецмановичке қарсы ойнайды.
