Бар қазына – кітапханада

Жиында Елбасы кітапха­на­сының директоры Бақыт­жан Темірболат өзі басқарып отырған мекеменің қызметіне тоқталып, кітапханалардың негізгі міндеті – білімді жинақ­тау, сақтау және беру екендігін баса айтып өтті.

− Бұл миссияның өзектілі­гі бүгінде күшейіп отыр. Адам­зат келер күннен орын алар заң­дылықтарды анықтау үшін тарихқа үңілсе, сол тарихты қамтитын баға жетпес ғылыми ақпаратты кітапханалар насихаттайды. Елбасы кітапханасы тарихи ақпаратты жинақтау мен сақтау тұрғысынан классика­лық кітапханаларға жақын, − деді ол.

Ал елордадағы Ұлттық ака­демиялық кітапхана директоры Үмітхан Мұңалбаева Мемле­кет басшысы Қасым-Жомарт Тоқаевтың «баланың оқуға деген қызығушылығы, қоршаған ортаны кітап арқылы тануы мектеп қабырғасында қалыптасу керек. Ал кітапхана оқушының сол ынтасын оятып, оны қызықты кітап әлеміне жетелеуі қажет» деген сөзін айта келіп: «Бүгінде, әлем жаңа сынақтарды еңсеріп, оның ішінде пандемиямен кү­ресіп жатқанда, адамның өзін дамытуға, жетілдіруге бос уақыты бар. Бұл жағдайда кітапхана – ізденуде көмекке келер бірінші құрал», − деді.

Сондай-ақ конференцияда Халықаралық кітапханалық қауымдастықтар мен мекеме­лер федерациясы (IFLA) және АҚШ-тағы Камарило көп­ші­лік кітапханасы мен Кана­да­дағы Ванкувер көп­шілік кітапха­насының қатысу­шы­лар­­ға құттықтау хаты оқылса, Мәс­кеу­дегі Ресей мемлекеттік кітапханасы бас директорының сыртқы байланыстар және көрме қызметі жөніндегі орынбасары Наталья Самойленко рухани-мәдени құндылығы мол басылымдарды электронды нұсқаға көшірудің маңыздылығын сөз етті.

Франция ұлттық кітапхана­сы халықаралық байланыстар ­бө­лімінің қызметкері Жераль­дин Шатлар мекеме қорында қа­зақ тілінде жазылған 130-дан ас­там әдебиеттің сақтаулы тұр­ға­нын жеткізіп: «Кітапхана­мыз­дың мұрасын кеңінен тара­ту­ға мүд­деліміз. Адамзаттың мәдени мирасын сақтау үшін біз әлем кітапханаларымен жұ­­мыс істейміз. Осы орайда тә­жірибемізбен, идеялары­­мыз­бен, озық білімімізбен бөлісу­ге дайынбыз», деді. Санкт-Пе­тербургтегі Б.Н.Ельцин атын­­дағы президенттік кітапха­на­­ның ақпараттық ресурс­тар ди­ректоры Елена Жабко «Ре­сей­­дің мәдени мұрасы: оны сақ­тау мен кеңінен таратудағы кітапханалардың рөлі» тақы­рыбында байыпты баяндама жасады.

Сонымен қатар жиында фи­­лология ғылымдарының док­торы, профессор Йиржи Шима (Прага), Түркия ұлттық кітапханасы баспасының бас директоры Али Одабаша (Ан­кара), Эстония ұлттық кі­тап­ханасы халықаралық байланыстар бөлімінің меңгерушісі Мари Каннусаар (Таллин), Бела­русь Республикасы Жазушылар одағы (Минск) төрағасының орынбасары Елена Стельмах, М.И.Рудомино атындағы шетел әдебиеті кітапханасының (Мәскеу) бас директоры Па­вел Кузьмин, «Қаржы жаңа­лықтары» словакиялық интер­нет-басылымының бас редак­торы Владимир Бачишин және Қазақстан Жазушылар ода­ғының төрағасы, ақын Ұлықбек Есдәулет пен публицист Сәдібек Түгел қатысып, кітапхана саласы туралы өзекті ойлары мен ұсыныстарын ортаға салды.