Ақтауда өткен актив жиынының басты тақырыбына айналды
Ел арасында жиі жүретіндіктен соң пікірлерге де қанықпыз. Жұртшылық биылғы Жолдаудың жылдағылардан ерекше болғандығын айтуда. Олар Жолдаудың кең айтылып, тез таралуын халыққа жағымды естіліп, оңтайлы келген тұстары аз емес екендігімен түсіндіреді және өз кезектерінде пікірлерін айтудан қалыс қалмауда.
Қазақстан Республикасы Парламенті Сенатының Төрағасы Қасым-Жомарт Тоқаевтың мұнайлы өлкеге кешегі сапары дәл осындай кезеңмен тұспа-тұс келді. Төраға Мемлекет басшысының «Қазақстан жолы – 2050: бір мақсат, бір мүдде, бір болашақ» Жолдауын халыққа түсіндіру мақсатындағы сапарын Ақтау қаласында облыс активімен кездесумен бастады. Алғашқы сөзді алған аймақ басшысы Алик Айдарбаев астаналық делегацияға Маңғыстау өңірінің әлеуметтік-экономикалық даму ырғағы мен Елбасы Жолдауын насихаттау, түсіндіру бағытында жасалып жатқан жұмыстар барысынан хабардар етті.
Жолдау жайлы ауқымды баяндама жасаған Қ.Тоқаев:
– Өздеріңіз білесіздер, өткен жылы Елбасы жариялаған «Қазақстан-2050» Стратегиясы жүзеге асырыла бастады. Биылғы Жолдау осы Стратегияның басты мақсаты – әлемнің дамыған 30 елінің қатарына кірудің нақты жоспарын жан-жақты баяндап берді. Бұл санатқа енуіміз үшін біз жаһандық бәсекеге төтеп беруіміз керек. Елімізде табысқа жетудің алғышарттары толығымен қалыптасқан. Еліміздің даму деңгейі әлемдегі оң үрдістердің беталысымен толық сәйкес келеді, – деп күллі қазақстандықтарды ұйыстырып, алыс болашаққа бастайтын «Мәңгілік Ел» идеясына тоқталды.
Сенат Төрағасының айтуынша, Мәңгілік Елге айналу үшін әрбір қазақстандық тынбай, нәтижелі еңбек етуі қажет. Таяудағы 15 жылда ғылымға негізделген экономиканы қалыптастыру арқылы Қазақстанның тұрақты дамуы қамтамасыз етілуі тиіс. Бұл міндет шын мәнісінде инновациялық сипатқа ие, өйткені, ол еліміздің индустриялық жағынан дамыған әлемге кіруін көздейді.
Сондай-ақ, Жолдаудағы ұлттық дамудың жеті басымдығына тоқталған Қ.Тоқаев олардың әрқайсысының өте маңызды екендігін және күрделі міндеттер жүктейтіндігін, сондықтан жоспарды берік ұстанып, тапсырылған міндеттерді орындауға барша болып және барынша жұмылу қажеттігін айтты.
Мемлекетіміздің ұзақмерзімді дамуын қамтамасыз ететін «Қазақстан-2050» Стратегиясын жүзеге асырудағы Парламенттің рөлі туралы айтқан Сенат Төрағасы аталған құжатты заңнамалық жағынан сапалы қамтамасыз ету міндеті тұрғанын атап өтті.
– Мемлекеттің саяси жүйесіндегі Парламенттің алатын орны ерекше. Басқа елдермен, оның ішінде кейбір демократиялық елдермен салыстырғанда, еліміздің заң шығарушы органына елеулі өкілеттіктер берілген, – деген Қасым-Жомарт Кемелұлы Парламенттің жоғарғы палатасының жергілікті билік органдарымен өзара тығыз іс-қимылы, Сенаттың негізгі құрамы өңірлердің өкілдерінен құралатынын айта келіп, «өңірлердің мүддесі дәл осы Сенатта тиімді ескеріледі», деді. Сенатта өңірлерді дамыту және ұлттық заңнаманы жетілдіру бойынша мемлекеттік саясатты, Президенттің бастамаларын түсіндіру мен насихаттау мақсатындағы «Өңір» депутаттық тобының жұмыс істейтіндігін айтып, 2013 жылы Парламент Сенаты атқарған жұмыстар барысын және жақын уақытта аталған стратегияны жүзеге асыруға қатысты қаралатын заң жобалары бар екендігін атап көрсетті.
Жолдаудағы инновациялық индустрияландыру, агроөнеркәсіптік кешеннің тиімділігін арттыру, агломерацияны, көліктік инфрақұрылым мен энергетиканы, шағын және орта кәсіпкерлікті дамыту, мемлекеттік институттар қызметін жетілдіру туралы айта келіп, ғылымға негізделген экономика құру туралы тапсырмаға арнайы тоқталды.
Маңғыстау – жан басына шаққандағы жалпы өнімнің көрсеткіші бойынша еліміздегі ең жоғары аймақтардың бірі. Мұнай мен газдың аса бай қоры бар, еліміздегі мұнайдың төрттен бір бөлігі өндірілетін, ірі отандық және шетелдік компаниялардың қаржылық мүдделері шоғырланған Маңғыстаудың мұнайы мен газының құрамдас бөліктері әлемде ең көп сұранысқа ие болып отырған өнеркәсіп – мұнай-химия саласын дамыту үшін нақты мүмкіндіктер туғызады.
Сол күні Сенат Төрағасы, «Нұр Отан» партиясы Саяси кеңесі бюросының мүшесі Қ.Тоқаев «Нұр Отан» партиясы облыстық филиалының мүшелерімен, «Жас Отан» өкілдерімен кездесіп, партия мүшелері алдына Н.Назарбаевтың жыл сайынғы Жолдауында және «Нұр Отанның» XV съезінде айтқан тапсырмаларын орындау жөнінде бірқатар міндеттер қойды.
Партияның Мемлекет басшысы алға қойған міндеттерді іске асыруға қоғамды жұмылдыруға, түсіндірме жұмыстарын жүргізуге міндеттілігімен қатар, қарапайым адамдардың нақты мәселелерін шешу, олардың құқықтарын қорғау, мүмкіндігі шектеулі азаматтарға жасалатын қамқорлық, сыбайлас жемқорлықпен күрес жөніндегі жұмыстардың маңыздылығын атап көрсетті.
Қ.Тоқаев Ш.Есенов атындағы Каспий мемлекеттік технология және инжиниринг университетінің студенттері және профессорлық-оқытушылар құрамымен, «Магабред» ЖШС нан зауытының еңбек ұжымымен кездесті.
Сенат Төрағасының сөзіне пікір қосқан жергілікті азаматтар ұсыныстарын да ұмыт қалдырған жоқ. Жоғарғы палата Төрағасы ұсыныстарды аяқсыз қалдырмауға тырысатындығын жеткізді.
Гүлайым ШЫНТЕМІРҚЫЗЫ,
«Егемен Қазақстан».
Маңғыстау облысы
