СҚО ветеринария басқармасының мәліметінше, 21-26 қыркүйек аралығында М.Жұмабаев ауданы Лебяжье елді мекенінде 1003 үй құсы қырылды. Бұл - жеті үйдің құсы. Негізінен 2-3 айлық құс - соның ішінде 130 тауық, 291 қаз, 582 үйрек өлген. Мамандар құстардың өлексесін жинап, өртеді.
«Ветеринарлық қызмет эпизоотиялық зерттеу жүргізілді. Өлген құстардан материал алынып, зертханаға жіберілді. 24 қыркүйек күні оның қорытындысы келіп, құс тұмауы екені расталды. Үй құстарына қауіпті ауру жабайы құстардан жұғуы мүмкін. Өйткені елді мекенде су қоймасы бар, онда аққулар, жабайы үйректер мен басқа да құстар мекендейді», дейді СҚО ветеринария басқармасы бөлімінің басшысы Қайырлы Қазанов.
Осыған байланысты М.Жұмабаев ауданы Лебяжье ауылы карантинге бүгіннен бастап жабылды.
