– Павильонның құрылысына қажетті 8 млрд теңге үш жыл бұрын мемлекеттік бюджеттен бөлінген болатын. Аталған сома 2015 жылы Миланда ұйымдастырылған көрмедегі павильон құрылысына жұмсалған қаржыдан шамалы көптеу. Оның да өзіндік себептері бар. Өйткені, екі павильонның көлемі әртүрлі. Қазақстан Миландағы көрмеде 2 000 шаршы метрлік павильон орнатса, бұл жолғы павильон 3 400 шаршы метр аумақты алып жатыр, – деді Аллен Шайжүнісов.
Ол ЕХРО-2020 DUBAI көрмесіндегі павильондардың құнына қатысты зерттеу жүргізілгенін айтты. Мәселен, Беларусь мемлекеті 2 мың шаршы метрлік павильонға 20 млн АҚШ долларын жұмсаған. Ал павильонының көлемі 4 мың шаршы метрден асатын Ресей секілді мемлекеттер 40 млн-нан астам доллар/еуро шығындаған.
– Біздің павильон өте жақсы жерде орналасқан. Қазақстан мен АҚШ-тың павильоны қатар тұр. Біріккен Араб Әмірліктерінің, Сауд Арабиясының, Италияның, Қытайдың, өзге де алпауыт мемлекеттердің павильоны қол созым жерде. Қарқынды даму жолына түскен Қазақстанның көрмеде сәтті орынға ие болуының өзі үлкен жетістік әрі мүмкіндік, – дейді А.Шайжүнісов.
Дубай, Біріккен Араб Әмірліктері
