08 Ақпан, 2014

Мақсат – ерліктің рухын көтеру

128 рет көрсетілді
Биыл кеңес әскерлерінің Ауғанстан жерінен шығарылғанына 25 жыл толғалы отыр. Осыған орай, кеше Ардагерлер ұйымдары Үйлестіру кеңесінің кеңейтілген отырысы болып өтті. Оған кеңес мүшелерінен өзге, еліміздің барлық өңірлерінен келген ауған қозғалысы ұйымдарының басшылары мен ұрыс қимылдарына қатысушылар және жауынгер-интернационалистер қатысты. Елордадағы Жауынгер-интерна­цио­налистер ескерткішіне гүл шоқ­тарын қоюдан басталған шарада Елбасының биылғы Жолдауы бойынша еліміздің стратегиялық бағытына айрықша мән берілді. Сон­дай-ақ, Ауғанстаннан кеңес әс­кер­лерінің шығарылуына 25 жыл толуына арналған жауынгер-ин­тернационалистердің форумын дайындау мен күн тәртібін белгілеу, форум қатысушыларының Елбасына үндеу жасау және Қазақстан Пре­зиденті жанындағы қоғамдық кеңес құру жобаларын талқылау өтті. Кеңес әскерлерінің шектеулі контингентін Ауғанстанға кір­гізу туралы шешімнің 1979 жылы 12 желтоқсанда КОКП ОК Сая­си­ бюросының отырысында қа­был­данғаны белгілі. Он жылға созылған ұрыс қимылдары тек 1989 жылдың 15 ақпанында аяқталды. Ауған соғысында 23 мыңнан астам қазақстандық өзінің әскери борышын өтеді. Соның ішінде 900 сарбаз бен офицер оққа ұшса, 23-і із-түзсіз жоғалып кетті. Сондай-ақ, 1,5 мың адам жарақаттан немесе аурудан көз жұмды. Қазақстан Республикасы Ардагерлер ұйымдарының Үйлес­тіру кеңесінің төрағасы генерал Бақытжан Ертаевтың айтуынша,­ бүгінгі бейбіт күнде ауған соғысынан алған жан жарасынан жыл сайын Астананың өзінде орташа есеппен 11 ардагер өмірден кетіп жатыр. Пешевар маңындағы Бадабер ауғандық босқындар лагерінде 12 кеңестік сарбаздың ерлікпен оққа ұшқанын тілге тиек ете келіп, генерал 220 әскери операцияда көз жұмған қаруластарын бір минут үнсіздікпен еске алуды ұсынды. Елбасы да ауған соғысы туралы ешкімді бейжай қалдырмайтын мына сөздерді айтқаны бар: «Ауғанстандағы соғыс кеңестік дәуірдің жылнамасында ең тра­ге­диялық беттердің бірі болып қатталды. Оның тек соғыс ардагерлерінің ғана емес, сондай-ақ, келесі ұрпақтың санасында мәңгі қалатыны анық». Ауған соғысының шынайы тарихын есте қалдыру мақсатында бірқатар шаралар қолға алынуда. Мысалы, 15 ақпанды Өзге елдердің аумағында әскери борыштарын өтеген қазақстандықтарды құрметтеу күні деп белгілеу туралы Премьер-Министр Серік Ахме­товтің атына депутаттық сауал да жолданыпты. Және де үстіміздегі жылдың ақпан-мамыр айларына­ жоспарланып отырғандай, І Жауын­гер-интернационалистердің рес­публикалық форумы өтеді деп күтілуде. Үйлестіру кеңесі, сонымен қатар, мектеп оқушылары үшін «Қазақстан патриоттары» шарасын өткізіп, жастардың кімге ұқсап, неге ұмтылуы қажеттігі тұрғысындағы ойларын ұштауға да кіріскелі отыр. Бұдан басқа, Үйлестіру кеңесі жанынан Ауғанстандағы соғыстың тарихын зерттеу үшін ғылыми-зерттеу институтын құру жайы да ортаға салынды. Жалпы, Ардагерлер ұйымдары­ның Үйлестіру кеңесі бұл шара­лар­дың барлығын ауған соғысы ар­да­герлеріне толықтай жағдай жасау үшін емес, солардың ерлігі негізінде жастарға патриоттық тәрбие берудің барлық тетіктерін қарастыру үшін ұсынып отыр. Енді бұл ұсынымдар тиісті орындарға жолданатын болады. Асқар ТҰРАПБАЙҰЛЫ, «Егемен Қазақстан».
Соңғы жаңалықтар

Ұқсас жаңалықтар