«... сірә да, өлмейтін шығармын!»

«Шоқ шайнап, от бүріккен Қасымдайын» деп тебіренген жыр дүлдүлі Мұқағали Мақатаевтың туған күні елордадағы Қазақстан-Ресей университетінде аталып өтті. Оған ұйытқы болған осы білім ордасындағы «Абайтану» орталығы еді. Кешке «Абай нұры» өнерлі жастар клубы да өз үлестерін қосты. «Жырсыз менің өмірге не керегім, Жырдан басқа жұртыма не беремін» деп жырымен халқын қанаттандырып келе жатқан ақиық ақынның өлеңдеріне жазған Т.Рақимов, А.Есмұханов, Е.Тілепбердиев, К.Жалғасов әндерін белгілі өнер шеберлері Е.Қасымов, М.Шәйкенов, Н.Арзамасов нақышына келтіріп орындады. «Дауысы асқақ, үні кең» деп ақын Б.Тобаяқов өлең арнады. «Абайтану» орталығының директоры А.Мұхамет­қалиқызы Мұқағалидың «Осы мен сірә да, өлмейтін шығармын, Сәл ғана мызғып ап, қайтадан тұрармын» деген екі жол өлеңін еске түсіріп, Абайдың рухани ізбасарларын әркез жастарға жеткізіп отыруды мақсат еткенін еске салды. Ал Қазақстан-Ресей университетінің ректоры, ҰҒА корреспондент-мүшесі Марат Молдахметов екі елдің арасындағы рухани сабақтастықты жалғастыру ниетінде жоғарыдағыдай орта­лықтың жұмыс істеп жатқанын, сонымен бірге, ол студенттерге өз таланттарымызды таныту ісіне де үлес қосып отырғанын Қасым, Мұқағали, Қадыр, Тұманбай секілді қазақ поэзиясының жарық жұлдыздарының екінші өмірін жаңғырту үрдісі қалыптаса бастағанын тілге тиек етті. Шынында, ұлтымыздың мақтанышына айналған алыптарын әркез осылай еске түсіріп отырсақ, ұтылмасымыз анық. Тіпті руханияттың айтулы тұлғаларын туған күнінде, не мерейтойында елеу үрдісін, әр жыл сайын поэзия кештерін жиі өткізу үлгісімен жалғастырсақ ұтылмас едік. Бұл жас ұрпақтың жақсыларын танып-білуіне мүмкіндік берер еді. Іргелес жатқан Ресей елі мұндай дәстүрді үзбей жалғастырып келеді. Соның бір мысалы, аз ғұмырында аз мұра қалдырса да көптей көріп Николай Рубцовқа арналған жыл сайынғы поэзия маусымы соның дәлелі деп білеміз. Осындай үлгі орнықса, көзі тірісінде «... сірә да, өлмейтін шығармын!» деп кеткен Мұқағали сөзі ақиқатқа айнала бермек. Сүлеймен МӘМЕТ, «Егемен Қазақстан».