Жағдай реттелетініне сенемін

Теңге бағамының төмен­деуіне, ал тиісінше АҚШ дол­ларының теңгеге шаққандағы бағасының көтерілуіне байланысты жағдайды естіген халық алғашында абдырап қалғаны, дәлірек айтқанда, не істерін білмей, әбігерге түскені рас. Себебі, бұл хабар бірінші кезекте бізді, яғни қарапайым жұрт­шылықты қатты толғандырады емес пе? Егер, шынымен де теңгенің бағамы түсетін болса, алдағы уақытта елдегі жағдай қалай болмақ?  Бұл сауал менің ойымша, Қазақстанның барлық азаматтарын, әсіресе қарапайым халықты толғандырмай және алаңдатпай қоймасы анық. Демек, алдағы уақытта Ұлттық банк болсын, Үкімет болсын, ең алдымен, қарапайым халықтың жағдайын, олардың тұрмысының төмендеп кетпеуін, жалпы алғанда, әлеумет әлеуетінің  құлдырап кетпеуін ойлауы керек секілді. Бір ғана мысал келтірейін. Мен өзім зейнеткермін. Ал мен секілді тек зейнетақымен ғана күн көріп жатқан азаматтар қаншама! Басқа тауарларды айтпай-ақ қояйын, мәселен, халық тұтынатын тауарлардың, азық-түліктердің бағасы өсіп кететіндей жағдай орын алатын болса, мен секілді зейнетақыға қарап отырған халықтың жағдайы не болмақ? Бұл ретте халықты «Дүкендердің сөрелерінде тұрған тауарлардың ішінде импорттық тауарлар қаншама. Егер, теңге ба­ғамы төмендесе, онда сырттан ке­летін азық-түліктердің бағасы да доллардың бағамына сәйкес өз­геріп, көтерілмей ме?» деген сауал­ да мазалары анық қой. Міне, мәселенің мәнісі қайда жатыр.  Мені де осы ой мазалап, азық-түлік алу үшін бір-екі дүкенге кіріп шықтым. Әзірге, мен алып жүрген күнбағыс майының бағасы сол қалпында, өзгермей тұр екен. Алдағы уақытта да халыққа қажетті, күнделікті тұтынатын осындай тауарлардың бағасы күрт көтеріліп кетпесе деген тілегіміз бар. Өзім бұл хабарды естіген кезде Үкіметтің не айтып жатқанын, Ұлттық банктің қандай мәлімдеме жасағанын білгім келіп, отандық телеарналарды қосып, тыңдадым. Әрине, әртүрлі пікірлерді естідім. Мәселен, бір азаматтар доллардың өсуіне байланысты даурығудың қажеті жоғын, бұл жағдай керісінше отандық кәсіпкерлердің импорт пен экспорттағы бәсекелестігін арттыра түсетіндігін алға тартуда. Ал Үкiмет пен жергiлiктi атқарушы органдар Ұлттық банкпен бiрлесiп, бағаның бірден өсуіне жол бермеу жұмыстарын жүргiзетiндерін, доллардың теңгеге шаққандағы бағамының теңгерімділігін ұстап тұру үшін барлық жағдай жасайтынын, алғашқы күндерi мұндай жағдайдың орын алуы  заңдылық екенін, алайда, теңге бағамына қатысты жағдай бiрнеше күннiң iшiнде тұрақталатынын айтып жатыр. Демек, бұл мәселе  – Үкі­мет­тің  де, Ұлттық банктің де ай­рықша назарында тұр деген сөз. Пре­зидент әрдайым халықтың әлеу­меттік жағдайына айрықша мән беріп отыратынын білеміз. Әлеуметтің әлеуетіне, халықтың тұр­мыс-деңгейіне, мемлекетіміз экономикасының көтерілуіне қатысты мәселелерді өзінің жыл сайынғы Жолдауынан да тыс қал­дырған емес. Мәрияш БОРАНБЕКОВА, зейнеткер. АСТАНА.