Аламанның топ басына талас басталды

Сочидегі XXII Қысқы Олимпия ойындарының жарыстары тәулігін 6 ақпаннан бастап есептегенде, мұндағы саңлақтар бұрнағы күні төртінші сайыстар сағаттарын өткізді. Бұл күні, яғни 10 ақпанда Адлердің ашық-жабық ареналарында бес медальдің жиынтығы сарапқа салынды. Онда биатлон, тау шаңғысы, коньки спорты, фристайлдың могул түрі және шорт-трек бойынша жүлделер сарапқа түсті. Қазақстан спортшылары осы сайыстардың барлығына да қатысты. Ал топ басында жалау желбіретіп, алға шығуға деген ұмтылыс күн асқан сайын қыза түсуде. Мұның үздік үлгісі бұрнағы күні айқын көрінді. Түске дейін алда ешкімге дес бермей, ең алда Норвегия спортшылары тұр еді, күн ауа бұрын үштікте болмаған Канада сарт етіп, көштің басына көлбеңдеп шыға келді. Мезгіл ақшамға құлаған шамада бірінші белесті Голландия саңлақтары аяқ астынан тартып әкетті. Ал түн жарымында «Үйеңкі жапырағы» елінің құрамасы қайтадан топ басына шықты. ЖАНҒАН ҮМІТ ПЕ, ЖАЛҒАН ҮМІТ ПЕ? Міне, осылай безбен басын сәт сайын алмастырған бұрнағы күннің жарыстары түс ауа басталды. Соның ішінде біздің көңілімізді ертерек елеңдетіп, үмітімізді көбірек үкілеген осылардың ең соңынан керуен керген фристайлдан ерлердің могул бағдарламасы болды. Осыдан екі күн бұрын Юлия Галышева біраз күшін сарп еткен жарыс сынды мұның финалы да түннің жарымы ауа тәмамдалды. Әдепкі екі іріктеу сынағы кешкі сағат 7:30-да айдау жолға түскен сайыстың үш финалдық бөлігі Мәскеу мезгілімен тура түнгі 22:00-де қанат жайды. Ол толық аяқталғанша, екі сағаттан астам уақыт кетті. Сөйтіп, Астана уақытымен сағат 2-ден өте биіктегі «Роза Хутор» экстрим-паркінен қалаға қарай аяңдап келе жаттық. Ал жарыс біздің талмай тамашалауымызға толық мүмкіндік берді. Бұл жолғы жұрттың қарасы өткендегіден де едәуір көп көрінді. Бізден үш жігіт өз хал-қадерлерінше қимыл жасап көрді. Соның ішінде Дмитрий Бармашов екінші квалификациядан қалып қойса, Дмитрий Рейхерд (суретте) пен Павел Колмаков финалға өтті. Мұнда бізге Пашаның финалдың екінші бөлігіне дейін жетіп, 10-орынға табан тірегені айтарлықтай жағымды жаңалық сезілді. Бірінші айналымнан кейін 29 үміткердің 12-сі келесі кезеңге қадам басты. Бұдан әрі тағы 6 тарлан бөлініп шығып, медаль бөлісіне қызу кірісіп кетті. Осы топқа алтыншы болып енген Рейхерд соңғы шайқаста тағы бір саты ілгері шығып, турнирді 5-орынмен тиянақтады. Бірақ бұл жолы төрешілерге өкпеміз қара қазандай деп айта алмасақ керек. Диманың қарсыластарының бәрі кіл «сен тұр, мен атайын» дейтіндей сақа жігіттер еді. Алтылықтың ауқымында Канаданың – үш, АҚШ, Ресей және Қазақстанның бір-бірден спортшылары қайтпай шайқасты. Әсіресе, бір елдің үш нояны шынымен шалт та, шабандоз да көрінді. Соны дәлелдеп, олар алғашқы екі орынды өздерінде алып қалды. Қызық болғанда, осылардың екеуінен де ылғи алда болып келген үшінші отандастары соңғы сы­нақта сәл-пәл қателікке жол беріп, төртінші орынға ығысып кетті. Мұны байқаған ресейлік жанкүйерлердің қуанышында шек болған жоқ. Бұл олардың үкілеп қосқан үміттері Александр Смышляевтің кемінде қола медаль алатынын білдіріп еді. Артынан расында солай болып шықты. Кана­да­лықтардың ең соңынан жүгірген соңғы өкілі нәтижесінде екінші орынға тұрақтады да, ресейлік үшінші сатыға қарай жылжып түсті. Бірақ бұған айылын жиған Смыш­ляев болған жоқ. Жарыстар аяқ­талған бойда журналистердің берген сұрақтарына алып-ұшып тұрып жауап берген ол бұл жеңісін жақында дүниеге келген қызына арнайтынын қуана хабарлап жатты. Ал чемпиондық тұғырға соңғы сәтте ғана тұяқ іліктірген Алек­сандр Биладо осымен екінші мәрте қатарынан Олимпиаданың алтынын алды. Мұның алдында ол бірін­ші чемпиондығына осыдан төрт жыл бұрын, өз елінің төрінде – Ка­на­даның Ванкуверінде қол жеткізіп еді. Бұған қарағанда, оның отандасы Микаэль Кингсбери үшін бұл жолғы күміс медаль Ойындар өрне­гін­дегі бірінші жоғары жүлде болды. Осылай Қазақстан спортшылары тағы да медальға таяқ тас­там жер қалғанда, оған жете алмай тоқтап қалды. Біздің үміт күт­кен екі могулшымыз да осы көрсет­кіш­ті қайталады. Мұның өзі сол үміті­міздің жанған шырақ па, жал­ған сұрақ па екенін білдіртпей, ойды әрі-сәрі етіп тастады. Сонда да болса, «Қазан аузы – жоғары» деп отырмыз. Себебі, бізді елден шыққалы елеңдетіп жүрген ерен жүйріктеріміз сайыс соқпағына әлі толық түскен жоқ. Сондықтан жанған үмітіміз әлі үлпілдеп тұр.

Медальдар қоржыны

 (12 ақпанға дейінгі мәлімет)

Орын	Мемлекет аты	Алтын	Күміс	Қола	Жиыны
1	Норвегия	4	3	4	11
2	Канада	4	3	2	9
3	Германия	4	1	0	5
4	Голландия	3	2	3	8
5	АҚШ	2	1	4	7
6	Швейцария	2	0	0	2
7	Ресей	1	3	3	7
8	Австрия	1	3	0	4
9	Франция	1	0	2	3
10	Беларусь	1	0	0	1
10	Оңтүстік Корея	1	0	0	1
10	Польша	1	0	0	1
10	Словакия	1	0	0	1
14	Швеция	0	3	1	4
15	Чехия	0	2	1	3
16	Словения	0	1	2	3
17	Италия	0	1	1	2
17	Жапония	0	1	1	2
19	Қытай	0	1	0	1
19	Финляндия	0	1	0	1
21	Ұлыбритания	0	0	1	1
21	Украина	0	0	1	1

ӘР КӨЛДІҢ ӨЗ ДУАДАҒЫ БАР Егер осы күні сайысқа сайланып шыққан сарбаздарымыздың бәрінен жоғары нәтиже күткенімізді айтсақ, онымыз шылғи өтірік болып шығар еді. Ақиқаты керек, әр көлдің өзі қонар дуадағы болады. Оны біз де пайымдай аламыз. Сондықтан атам қазақтың «Алуан-алуан жүйрік бар, әліне қарай шабады» деген нақылын жиі қаперімізге кіргізіп қоямыз. Біздің жігіттер де солай әліне қарай шапты, бағына қарай тапты. Олардан екі могулшымыз – Юлия Галышева мен Дмитрий Рейхердтен күткен көрсеткішті дәметкен жоқпыз. Юлия демекші, бұл қызымыз қайсыбір күні айтқаны өтіп, атқаны жетіп тұрған төрешілер тарапынан тартқан дәккісінің дүмпуімен өзінің спортты тастайтынын жайып салыпты. Біз оның мұнысын ашумен айтқан албырт сөз шығар деп, алау көңілімізді алдарқатып отырмыз. Әйтпесе, 21-ге жаңа келген бұл өрендерге өреден қолын созатын өскелең биіктер әлі алда қол бұлғайтындай. Әзірге біздің бағландардың бағындырған биігі осылайша бесінші орын болып отыр. Тағы екі саңлағымыз жетінші орыннан тізгін тартты. Бұлардың біріншісі Юлия болса, екіншісі конькиші Роман Кречтің еншісіне жазылды. Адалын айтуымыз керек, осы күні «Адлер-Арена» төрінде 500 метрлік қашықтықта атой салған бұл жігітіміз нағыз ерлерге тән қылық танытты. Квалификацияда жетінші орыннан көрінген ол қорытындысында да осы орынды ұстап қалды. Ал тұғыр түгелдей тағы голландиялық ұшқырлардың қанжығаларында кетті. Тек соңғы сәттерде өзара орын ауыстырып алғандары болмаса, алдыңғы екі медальдің тағдыры тез шешілді. Мұнда бұған дейін ұдайы бірінші болып келген Ян Смеекенс соңында екінші болып қалды. Оның орнын Михел Мюлдер басты. Үшінші орынға іріктеу сынағын алтыншы болып аяқтаған Роналд Мюлдер орналасты. Осындай алыптардың айналасынан табылған Романды да біз енді осал көрмедік. Себебі, ол өз мүмкіндігінің шегіне дейін барын салды. Осылай саңлақтарымыздың ша­масын білгендіктен шығар, ер­лердің 12,5 шақырымдық қашық­тықтағы спринттік биатлонында 29-шы тепкішектен табылған Ян Савитскийдің хабарын алғаш есті­ген журналист Ардақ Тоғымов мұны бірден жап-жақсы жетістікке балады. Шынында да дүниенің төрт бұрышынан кілең ығай мен сығай жиылған жаһандық жарыс­та алғашқы отыздықтың ішіне ілігудің өзі оңай шаруа болмаса керек. Ал онымен қабат түскен Сергей Наумик осының алдындағы мәресінің межесінен табылып, 58-орынға табан тіреді. Ал бұл жолы жүлделі үштікті екі француз және бір чех спортшысы құрады. Атап айтқанда, Олимпиада алтынын француз Мартен Фуркад алса, қола медальға оның отандасы Жан-Гийом Беатрикс қол созды. Күміс медаль осылардың ортасындағы ежелгі Моравия жерінен шыққан Ондржей Моравецке бұйырды. Сөйтіп, чех жігіті осының алдын­дағы 10 шақырымдық биатлонда қола медаль алған отандасынан бір белес биікке кетті. Жоғарыдағы үштік, сонымен бірге, алдыңғы сайыстың алтын жүлдегері норвег Оле-Эйнар Бьорндаленді награда шегінен бір саты сыртқа шығарып жіберді. Бұл күнгі жарыстардың басын шорт-трек бойынша сынға түсушілер бастап еді. Онда кана­далық Шарль Амлен алдына жан салмады. Екінші орынға қытай Тянью Хань орнығып, өз еліне әзірге бірінші және соңғы марапатты алып берсе, ресейлік Виктор Ан өз құрамасының қоржынына кезекті қола медальді салды. Жалпы саны 36 саңлақ қырманына қиқу қосқан бұл бәйгеде біздің Айдар Бекжанов – 29-шы, ал Денис Никиша 31-ші нәтиже көрсетті. Бұл күні бір жарыс аяқталмай қалды. Дәлірегі, әйелдердің шана спорты бойынша жарысының алғашқы екі кезеңі ғана ойналды. Оның соңғы үшінші және төртінші жүгірістері кеше түнде жасалды. Әдепкі күннің екі сынағы негізінде 29-орынға қоныс тепкен Екатерина Аксенова атты қызымыздан да енді табыс күте алмасақ керек. Серік ПІРНАЗАР, «Егемен Қазақстан» – Сочиден.