Nur Otan партиясы облыстық филиалы жанындағы Miras қоғамдық кеңесі отырысында мамандар осылай деп дабыл қақты. «Түркістан ғажайыптары» экспедициясы ай бойы «Ұлттық мұра» партиялық жобасы аясында облыстың киелі, қасиетті орындарына сапарға шығып, 85 нысанның жай-күйін зерделеген. Қоғамдық кеңесте есеп берген облыстық мәдениет басқармасының тарихи-мәдени мұраны қорғау, қалпына келтіру және пайдалану жөніндегі орталықтың директоры Жандос Құрбан аудан, қалаларда тарихи ескерткіштер мен орындарды қорғау бағытындағы жұмыстарды күшейту керектігін айтты. «Келес ауданындағы Алқакөл көліне баратын 10 шақырым жолға асфальт төсеу және «Алқакөл сұлама» қырғынының 300 жылдығына арнап мемориалды кешен орнатып, насихаттаған жөн. Созақ ауданындағы Қошқар ата, Мұхаммед Ханафия, Балықшы ата, Хақназар хан кесенелеріне, Қазығұрт ауданындағы Ысқақ ата, Шілтен ата кесенелеріне, Төлеби ауданындағы Мансұр ата кесенесіне, Жылақ ата бұлағына, Сайрам ауданындағы Ер Бекіш ата кесенесіне, Түлкібас ауданындағы Қараүңгір тұрағы, Дәу баба кесенесіне баратын жолдарды реттеп, мүмкіндігі болса асфальт жабын төсеу керек», деді Жандос Құрбан. Сондай-ақ облыс аумағындағы барлық тарихи-мәдени, киелі және қасиетті жерлерге баратын жол бойларындағы сілтеуіш белгілерді жаңарту, жоқ болса қою, барлық тарихи орындардың мемлекет қорғауында екенін көрсететін тақтайшаларды жаңартуға облыстық бюджеттен қаржы қарау қажет. Шырақшылардың, ауыл әкімдерінің тарихи-мәдени ескерткіштерді қорғау бойынша біліктілігін арттыру үшін тұрақты түрде семинарлар өткізу де күн тәртібіндегі мәселе.
Miras қоғамдық кеңесінің төрағасы, жазушы Мархабат Байғұт төрағалық жасаған жиында өңірде ұлттық спорт түрлерін дамыту бағытындағы жұмыстар да сараланды. «Тарихын тану – тағылымды іс» тақырыбында баяндама жасаған облыстық денешынықтыру және спорт басқармасы басшысының орынбасары Айтмахаметәлі Бердашев облыста асық ату, қазақ күресі, көкпар, теңге ілу, тоғызқұмалақ, аударыспақ, бәйге, жамбы ату, саят, жекпе-жек сынды ұлттық спорт түрлері дамып келе жатқанын айтып өтті. Ұлттық спорт түрімен жалпы шұғылданушылар саны 84 мыңнан асады. Олар облыстағы 1 826 үйірмеге қатысады. Облыс спортшылары биылдың 9 айында ұлттық спорт түрлерінен халықаралық, республикалық және облыстық жарыстарға қатысып, 76 алтын, 65 күміс, 25 қола медальді жеңіп алған. Қоғамдық кеңес отырысында өңірдің туристік әлеуетін көтеру, тарихи ескерткіштерді қорғау, руханиятқа, спортқа қолдау көрсету және насихаттау партияның жол картасының басым бағыттарына енгізілгені айтылды. Бұл орайда әрбір басқарма немесе орталық өз салаларындағы мәселелерді жасырмай айтып, жергілікті әкімдіктерге ұсыныстар беріп, белсенді жұмыс жүргізуі тиіс.
Жиын соңында Nur Otan партиясы облыстық филиалы төрағасының бірінші орынбасары, фракция жетекшісі Бейсенбай Тәжібаев өңір тарихын, өлкетануды зерделеуде табысты еңбек еткен «Түркістан ғажайыптары» өлкетану экспедициясы мүшелерін Алғыс хатпен марапаттады.
