Батыс Қазақстан облысының жастар саясаты мәселелері басқармасы қолдап, «Ғасыр» жастар қоғамдық бірлестігі ұйымдастырған жас күйшілер жарысына қатысушылар аз болмады. Осының өзі көңілге қуаныш ұялатты. Жақында ғана пайдалануға берілген ақшаңқан «Атамекен» өнер ордасында өткен күй бәсекесі Қазақстан Республикасы Тәуелсіздігінің 30 жылдық мерейтойына орайластырылды. Шара еліміздегі күйшілік өнерді өскелең ұрпаққа, өнерсүйер жұртшылыққа кеңінен насихаттау, жас таланттар мен шебер орындаушыларды анықтау, дарынды өнерпаздардың кәсіби шеберліктерін арттыру мақсатында ұйымдастырылған. Байқау барысында жастарға ұлттық құндылықтарды насихаттау мақсатында арнайы ұлтық қолөнер түрлерінен көрме ұсынылды.
«Күй – тектілік тереңі!» атты облыстық жас күйшілер сайысы 2 кезеңнен тұрды. Іріктеу кезеңінен іркілмей өткен ең үздік жас күйшілер финалдық бәсекеде сынға түсті. Жеңімпаздар 14-18 және 19-29 жас аралығындағы екі топ бойынша анықталды.
Сонымен сайыс нәтижесінде 14-18 жас аралығы бойынша жүлделі I орынды – Наурызбек Күзенбаев, II орынды – Эрнест Қайыржанов, III орынды Айзада Қибашова иеленді. Ерекше өнерімен көзге түскен Жұлдыз Нариманова мен Мәдина Қадырғалиеваға «Көрермен көзайымы» жүлделері бұйырды. Ал 19-29 жас аралығы бойынша I орын сыйлығы Қайрат Байқұттыға бұйырды. Жүлделі ІІ-III орынды Қыдырнияз Егінғали мен Темірлан Сыралиев өзара бөлісті. «Көрермен көзайымы» аталымына Бекзат Рамазан мен Нұрай Үмбетова лайық деп танылды. Үздіктерге арнайы диплом, естелік сыйлық және қаржылай сертификат табыс етілді.
Батыс Қазақстан облысы
