Партияның идеология мәселелері жөніндегі хатшысы болып Құмар Ақсақалов тағайындалды
Құмар Ақсақалов Мәскеу ауыл шаруашылығы өндірісінің инженерлері институтын тәмамдаған, экономика ғылымдарының кандидаты. Әр жылдары Қостанай облысы аудандарында әкім, Қазақстан Президенті Әкімшілігінің мемлекеттік инспекторы, Жамбыл облысы әкімінің әлеуметтік мәселелер және идеология жөніндегі орынбасары қызметтерін атқарған.
2010 жылдан бері – «Нұр Отан» партиясы Орталық аппаратының басшысы, Саяси кеңестің мүшесі.
Идеология жөніндегі жаңа хатшыны таныстыра келе, «Нұр Отан» партиясы Төрағасының бірінші орынбасары Б.Байбек партия Төрағасының тапсырмасы бойынша «Нұр Отанның» аймақтардағы қызметі артып, партия жұмысы «жобалық вертикаль» бойынша жасақталып жатқанын атап өтті.
«Құмар Ақсақаловтың аудандық деңгейден Президент Әкімшілігіне дейінгі түрлі мемлекеттік жұмыс тәжірибесі оның қойылған міндеттер биігінен көрінуіне мүмкіндік беретініне сенемін. Бұл тағайындауды атқарылған жұмысқа берілген жоғары баға деп санаймын», деді Б.Байбек.
Партияның Орталық аппаратының басшысы болып Әсел Жүнісова тағайындалды
Әсел Жүнісова әл-Фараби атындағы ҚазҰУ, Жапонияның Жоғары мемлекеттік басқару мектебін тәмамдаған, экономика ғылымдары және мемлекеттік басқару магистрі.
Әр жылдары мұнай-газ саласында, Стратегиялық жоспарлау агенттігінде, Экономика және бюджеттік жоспарлау министрлігінде, «ҚазТрансГаз» АҚ-та, «Самғау» Ұлттық ғылыми-технологиялық холдингінде және «Оңтүстік» ӘКК-де жұмыс істеген. 5 жылға жуық Қазақстан Президенті Әкімшілігінде сектор меңгерушісі, кейін Стратегиялық зерттеулер және талдау орталығы меңгерушісінің орынбасары болып қызметтер атқарды.
2013 жылғы наурызда «Нұр Отанның» Орталық аппараты басшысының орынбасары болып тағайындалған, партия Саяси кеңесінің мүшесі.
Орталық аппараттың жаңа басшысын таныстырған Б.Байбек партия мүшелерінің 60%-ы, ал «Нұр Отанның» Саяси кеңесінің өкілетті органында 30%-ы әйелдер екенін атап өтті.
«Әсел Жүнісова «Нұр Отандағы» басшылық лауазымға тағайындалған тұңғыш әйел болып отыр. Бұл партия Төрағасы тарапынан үлкен сенімді білдіреді. Бұл тағайындауды билік партиясының, сонымен қатар, қоғам мен мемлекет жұмысында әйелдердің маңызды рөліне деген құрмет деп қабылдаймыз», деп атап өтті Б. Байбек.
