Білім • 10 Қараша, 2021

Қандай компаниялар түлектерді жұмысқа алады?

«Атамекен» Ұлттық кәсіпкерлер палатасы қазақстандық жоғары оқу орындарының білім бағдарламаларына талдаулар жүргізіп келеді. Палата көбіне түлектердің еңбек нарығындағы бәсекеге қабілетіне қарай талдайды. Жақында «Бизнес және менеджмент» бағыты бойынша бакалавриат бағдарламалары түлектерінің жұмысқа орналасу жайын саралады. Нәтижесінде, шетелдік және отандық ірі компаниялардың қай университет бітірушілерін жұмысқа жиі алатынын анықтады.

Айдана ШОТБАЙҚЫЗЫ

«Атамекен» таратқан ақпаратқа сүйенсек, 2020 жылғы статистика бойынша 10 023 адам «Мемлекеттік және жергілікті басқару», «Маркетинг», «Менеджмент», «Әлемдік экономика», «Бағалау», «Есеп және аудит», «Қаржы және экономика» сияқты 8 мамандық бойынша бакалаврды бітіріп, диплом алған.

Ұлттық кәсіпкерлер палатасы басқарма төрағасының орынбасары Олжас Ордабаев: «Бұл түлектердің 2500-і – декреттік демалыста, әскерде, магистратурада (Қазақстанда және шетелде) оқуын жалғастырып жатыр немесе шетел азаматтары. Қалған 7 523 адамға сараптама жүргізілді. 79 пайызы диплом алғаннан кейін 12 ай ішінде жұмысқа орналасқан, бірақ оның 71 пайызы ғана 3 айдан аса уақыттан бері жұмыс істейді (тұрақты жұмыспен қамтылған)», деді.

«Атамекен» ҰКП аналитикалық деректеріне сәйкес Big4 (Ernst&Young, KPMG, Deloitte, PricewaterhouseCoopers) компаниясы «Бухгалтерлік есеп және аудит», «Қаржы» мамандықтары бойынша көбіне келесі университеттердің түлектерін қабылдайды: KIMEP; Қазақ-Британ техникалық университеті (Академиялық адалдық лигасының мүшесі); М.Нәрікбаев атындағы КАЗГЮУ университеті (Академиялық адалдық лигасының мүшесі); NARXOZ университеті; Almaty Management University (Академиялық адалдық лигасының мүшесі).

Олжас Ордабаев аталған сала түлектері үшін ең ірі жұмыс берушілер қатарында «Қазақстан Халық Банкі» АҚ, «Еуразиялық банк» АҚ, Kaspi Bank АҚ, «Хоум Кредит Банк» АҚ және «Банк ЦентрКредит» АҚ компаниялары бар екенін айтады.

Күннің маңызды және өзекті жаңалықтарын «Егемен Қазақстан» телеграм каналынан оқыңыз