● Елімізде демографиялық зерттеулер орталығы құрылады. Ол бойынша атқарылатын жұмыстар пысықталу үстінде.
● Республиканың автожолдарында өткен тәулікте 583 адам қар құрсауынан шығарылды. Оның ішінде 34 жасөспірім бар.
● Астанада келер жылы ЭКСПО-2017 алаңын жылумен қамтамасыз ететін магистраль салынады. Бас шаһардың солтүстік-батысы мен оңтүстік-батысы аралығына салынатын бұл құбырдың ұзындығы 21,5 шақырым құрайды.
● Қазіргі кезде елімізде 3 351 нотариус қызмет жасайды. Ал адвокаттардың саны 4,5 мыңға жуықтаған.
● «Талдықорған – Алматы» тасжолының құрылысы келер жылы аяқталады. 130 млрд. теңге бөлінген жұмыстың аясында Қапшағай өңіріне дейін алты жолақты жол салу көзделген.
● Биыл Ақмола облысында үдемелі индустриялық-инновациялық бағдарлама аясында 11 нысан іске қосылады. Соның ішінде күкірт қышқылы зауыты да бар.
● Шымкент қаласында өткен жылы 3 млрд. теңге бөлініп, 13 шағын ауданға газ құбыры тартылған. Осы жұмысты алдағы мерзімде де іске асыру жоспарлануда.
● Павлодар облысындағы мұнай-химия зауытына энергия менеджменті жүйесіндегі сәйкестік сертификаты берілді. Зауыттың ішкі құрылымы өткен жылы талапқа сай жаңартылған болатын.
● Орал қаласындағы Назарбаев зияткерлік мектебінде алғашқы әлемдік робот техникаларының олимпиадасы өткізілді. Оған еліміздің 15 қаласынан оқушылар қатысты.
● Ақтау қаласында бағаны тұрақтандыру үшін жергілікті сауда кәсіпорындарының жәрмеңкесі өткізілуде. Бұл игілікті бастама апта сайын жалғасын тауып отыр.
● Қарағанды облысында «Болашақтың эргономикасы» деп аталатын халықаралық байқау жарияланды. Ол баламалы энергия көзін дамытуға бағытталған.
Egemen.kz хабарлары мен облыстық әкімдіктер сайттарының материалдары бойынша дайындалды.
