Мұндай ерітіндіні Қазақстан бұған дейін шетелден алдырып келген. Енді оның орнын басатын отандық өнім бар. Ғалымдардың осы жаңалығы медициналық қызметтің құнын төмендетуге мүмкіндік береді. Өйткені бұл қаржылық жағынан да, географиялық жағынан да қолжетімді бола түспек. Өнімді әзірлеушілердің айтуынша, ерітіндінің сапасы шетелдік аналогтардан кем түспейді.
С.Аманжолов атындағы Шығыс Қазақстан университеті Ұлттық ғылыми зертханасының кіші ғылыми қызметкері Айдана Имашева: «Ғалымдарымыздың жасап шығарған туындысы импортты алмастыру мәселесін шешеді. Осы зерттеудің нәтижесінде биоматериалды сақтауға арналған бекітуші ерітіндінің оңтайлы құрамы жасалды. Бұл биоматериалдарды тұрақтандыруға және тасымалдауға мүмкіндік береді. Яғни онкологиялық ауруды одан әрі диагностикалау үшін жатыр мойнына жақпа ретінде пайдаланылады. Бұл әзірлеменің бірегейлігі – қатерлі ісікті тез диагностикалау мәселелерін кешенді түрде шешу», деді.
Ғалымдар тобы өздері әзірлеген бекітуші ерітіндіге патент алғанын айта кету керек. Сөйтіп, бұл өнім Қазақстан Республикасының дәрілік заттар мен медициналық бұйымдар тізіліміне енгізілді. Қазіргі таңда жоба коммерцияландыру сатысында. Сонымен қатар ғалымдар басқа да биологиялық материалдарды сақтау ерітіндісінің құрамын жақсарту барысында жұмыс істеуде.
