Smart-жылыжай ауа райының жаңбырлы, қарлы күндеріне төзімді. Мұнда ауа температурасы, ылғалдылық пен күн сәулесі смартфон арқылы бақыланады. Бұл өз кезегінде фермерлерге өндіріс көлемін ұлғайтып, жұмыс күші шығынын азайтуға мүмкіндік береді.
Қанатқақты жобаның әлеуетін университет студенттері кеңінен пайдаланып, агротехниканың заманауи жетістіктерін игермекші. «Ақылды жылыжайдың» ашылу салтанатына қатысқан Ауыл шаруашылығы министрі Ербол Қарашөкеев мұнда еліміздің ауыл шаруашылығы саласына қажетті мамандар даярланатынын жеткізді. Яғни оқу-тәжірибелік шаруашылықта инновациялық жылыжайды пайдалану арқылы студенттер көкөніс дақылдарын өсіру технологиясын іс-тәжірибеде игеріп, ауыл кәсіпкерлеріне smart технологиялармен байланысты семинар-тренингтер өткізілмек. Ал ғалымдар агротехникалық, ұйымдастыру-шаруашылық жұмыстармен қатар ғылыми-зерттеулер жүргізіп, көкөніс дақылдарының әртүрлі сұрпының фенологиялық фазаларына мониторинг жасайды.
Академик Тілектес Есполов бүгінде еліміздің ауыл шаруашылығын дамыту үшін аграрлық ғылымды өндіріспен байланыстыра отырып дамытудың маңыздылығын атап өтті. Оңтүстік Корея Республикасының тәжірибесіндегі «ақылды» инновациялық технологиялар арқылы көкөніс өсіру әдісін отандық өндіріске енгізу таяу келешекте бұл бағытта соны серпіліске ықпал ететіні сөзсіз.
Инновациялық жылыжай құрылысын бастау туралы келісім 2019 жылы елордада өткен Қазақстан-Оңтүстік Корея бизнес-форумында жасалған болатын. Осы ықпалдастық аясында өткен жылы Оңтүстік Корея Республикасының Ауыл шаруашылығы технологияларын коммерцияландыру және енгізу қоры мен ҚазАҰУ «Агроуниверситет» оқу-тәжірибелік шаруашылығы базасында «Ақылды жылыжай» ашу және пайдалану туралы келісім жасалып, инвестицияның негізгі бөлігі шетелдік әріптестер тарапынан жұмсалып отыр.
АЛМАТЫ
