Ғажайып аппарат

Облыстық онкологиялық дис­пан­сердің материалдық-техникалық базасы тағы бір заманауи қондырғымен толықты. Медициналық мекеменің бас дәрігері Ермек Әбдірімовтің айтуын­ша, өңір республикалық қазы­наның қаражатына сатып алынған компью­терлік томограф орнатылған үш об­лыстың бірі саналады. – Бағасы 320 миллион теңге тұра­тын әмбебеп медициналық құрал-жаб­дықтың артықшылықтары өте көп. Ең басты жаңалығы ретінде күрделі обыр ауруларының диагнозын санаулы уақыт ішінде жедел әрі айна-қатесіз дәл анықтау мүмкіндігін айтар едім. Өкінішке орай, облыс обыр аурулары жөнінен елімізде алдыңғы орындардың бірінде тұрғанын ескерсек, аса қатерлі науқастардың алдын алуға, уақтылы ем-дом қолдануға үлкен септігін тигізері анық, – дейді Ермек Ғаббасұлы. Бүгінде компьютерлік томографпен жұмыс істейтін мамандар Беларусьте білімдерін жетілдіріп келді. Санаулы күндерден кейін алғашқы пациенттер тегін қабылдана бастайтын болады. Өмір ЕСҚАЛИ, «Егемен Қазақстан». Солтүстік Қазақстан облысы.