Небәрі 24 жыл ғұмыр кешкен ер мінезді Есенкелдінің есімі жанкүйерлердің есінде. 1971 жылы Ақтөбе облысындағы Шалқар қаласында туып-өскен ол Алматыдағы Қажымұқан атындағы спорт мектеп-интернаты мен Қазақтың дене шынықтыру және спорт институтында шеберлігін шыңдады. Әрине, тоқсаныншы жылдардың басында бұл балуанның боз кілемде жасындай жарқылдағаны баршамыздың жадымызда. Аса жеңіл салмақта күрескен қолтоқпақтай ғана қазақ жігіті жасөспірімдер арасындағы әлем біріншілігінің күміс жүлдегері атанып, қырағы бапкерлердің назарына ілікті. Содан кейін-ақ ересектер дуына еркін қосылып, талай дүрмекте дара талантымен оқшауланды.
1990-1991 жылдары Батырғарин Әлем және КСРО кубоктарының иегері, КСРО халықтары спартакиадасы мен Бүкілодақтық универсиаданың жеңімпазы, Одақ чемпионатының күміс жүлдегері атанды. Басқа да дүбірлі додаларда топ жарды. Бір ғажабы, аса дарынды балуан бұл белестердің барлығын 20 жасқа жетер-жетпес шағында-ақ бағындырды. Жалпы, Есенкелді грек-рим күресінен Ақтөбе өңірінен шыққан тұңғыш халықаралық дәрежедегі спорт шебері екенін де айта кетуге тиіспіз. Арада 20 жыл өткен соң ғана Асқат Құдайбергенов пен Әсет Әділов сол деңгейге жетсе, бүгінгі таңда әлем чемпионатының күміс және қола жүлдегері, құрлықтық жарыстарда сан мәрте жеңіс тұғырына көтерілген Мейрамбек Айнағұлов атой салып жүр. Ақтөбелік балуандардың осы жарқын жеңістерінің алтын бастауында қыршын кеткен Есенкелдідей азаматтың тұрғанын кейінгі ұрпақ ұмытпауы керек.
– Есенкелдінің екпініне қарап, көпшілік «Келешекте ол Олимпия ойындары мен әлем чемпионаттарында топ жаруға тиіс» деп топшылады. Бірақ адамның айтқаны емес, Алланың бұйрығы болады екен. Нарық қыспаққа алған тұста отбасын асырау үшін досым үлкен спорттан қол үзіп, түрлі кәсіптің тұтқасын ұстады. Араға екі жылдан аса уақыт салып, тұрмыстық жағдайы түзелген соң боз кілемге қайта оралды. Келген бетте Қазақстан чемпионы атанды. Бұл – 1994 жыл еді... Содан Атланта Олимпиадасында атой салсам деп армандады. Басқа да байрақты бәсекелерде қазақтың туын биікте желбіретуді аңсады. Бірақ ол жоспарлары жүзеге аспады. Нағыз жалындап тұрған шағында досым із-түзсіз жоғалып кетті, – дейді кезінде Батырғаринмен бірге күрескен досы әрі жерлесі, белгілі спорт комментаторы Аспандияр Есенжолов.
Осыған дейін Есенкелді Батырғаринді еске алу турнирі Шалқарда ұйымдастырылып келген еді. Кейінгі кезде ол облыс орталығында өтіп жүр. Биылғы бәсекеде Бірлескен күрес әлемі (UWW) ұйымының талабына сай 10 салмақ дәрежесі бойынша түрлі-түсті медаль сарапқа салынды. Бұл жарыста Қырғызстан құрамасы командасы мүшелерінің даярлығы өте жоғары деңгейде екені анық байқалды. Алатаудың арғы жағынан келген балуандар бас жүлденің үшеуін олжалады. Олар – Разақ Байшекеев (63 кг), Әбдіғазиз Асқарбек (67 кг) және Жеңіс Жұмабек (87 кг). Ал қалған салмақтарда талдықорғандық Ербол Камалиев (55 кг) пен Дамир Тұрсынов (82 кг), Есет батыр колледжінің түлегі Диас Сайлауов (60 кг), қарағандылық Олжас Ерғали (72 кг), қостанайлық Диас Жәлелов (77 кг), жамбылдық Темірбек Ертілеу (97 кг) және шымкенттік Нұртас Қыдырбай (130 кг) алтын тұғырға көтерілді.
