Дипломатиялық қатынастар – жаңа елдермен

Сингапурде Бірлескен коммюникеге қол қою арқылы Қазақстан Республикасы мен Вануату Республикасы арасында дипломатиялық қатынастар орнады. Аталған құжатқа қазақстандық тараптан Сингапурдегі елші Е.Баударбек-Қожатаев, ал Вануату тарапынан Премьер-министрдің орынбасары – Сыртқы істер министрі Эдвард Нипаке Натапеи қол қойды. Кездесу барысында тараптар түрлі саладағы екі ел ынтымақтастығының болашағын талқылады. Сондай-ақ, Нью-Йоркте Қазақстан Республикасы мен Кирибати Республикасының БҰҰ жанындағы Тұрақты өкілдері Қайрат Әбдірахманов және Ма­курита Бааро екі ел арасында дипломатиялық қа­тынастар орнату туралы бірлескен коммюникеге қол қойды. Қол қою рәсімі кезінде екіжақты деңгейдегі ынтымақтастықтың болашағы және Қазақстан мен Кирибати үшін қызығушылық тудыратын БҰҰ күн тәртібіндегі маңызды мәселелер туралы пікір алмасу өтті. Солардың ішінде теңізге шыға алмайтын елдердің мәселелерін шешу, кішкене аралды елдер, тұрақты дамудың мақсаттарын жасау, қоршаған ортаны қорғау және т.б. бар. Кирибати елшісі Қазақстанмен берік тұрақты әріптестік орнайтынына сенімін білдірді. «Егемен-ақпарат».