Қазақстандық теннисші Ярослава Шведова Бразилияда өтіп жатқан Brasil Tennis Cup турнирінің 1/4 финалына өтті.
Ол жарысты жақсы бастап, бірінші айналымда испан теннисшісі Силвия Солер-Эспиносаны екі сетте жеңсе, одан кейін чех спортшысы Барбара Захлавова-Стрыкованы – 6:2, 7:5 есебімен ұтты. Енді ол ширек финалда турнирдің алтыншы ракеткасы румын теннисшісі Александра Кадантумен кездеседі.
Осы турнирде Шведова жұптық сында да өнер көрсетуде. Ол Анабель Медина Гарригеспен бірге екі ойынды жеңіп, жартылай финалға жолдама алды.
Турнирдің сыйақы қоры – 250 мың АҚШ доллары.
ЖАСТАР МЫҚТЫНЫ АНЫҚТАЙДЫ
Қызылордада 1996-1997 жылдары туған жастар арасында бокстан ел чемпионаты басталды. Оған еліміздің барлық өңірінен келген 200-ге жуық былғары қолғап шебері қатысуда. Жекпе-жектер 11 салмақ дәрежесі бойынша өтуде. Биылғы жастар арасында өтіп жатқан жарысқа әлем, Азия чемпионатына қатысқан боксшылар да күш сынасуда. Олардың арасында әлем чемпионы астаналық Рахат Мыржықпаев, Азия чемпиондары қарағандылық Владислав Сталбовский, қызылордалық Сабыржан Әбілов пен басқа да боксшылар бар. Қазақстан чемпионаты бір аптаға созылады. «Егемен-ақпарат».
