М.Горбачев қаншалықты жанталаса қимылдап, Одақты сақтап қалуға әрекет еткенімен, КСРО-ның ыдырауын тоқтату мүмкін емес еді. Алдымен Эстония, Литва және Латвия тәуелсіздігін жариялады. 1991 жылдың тамыз-желтоқсан айларында қалған республикалар түгелдей өз тәуелсіздігін жария етті. Елбасы айтқандай, саясаттың қызуы көтеріліп, Горбачев пен Ельциннің текетіресі шегіне жетіп, бір кездері темірдей тәртіпке негізделген орталықтағы басшылықтан береке кеткен сол тұста Қазақстан тарапынан жіберілген жалғыз қателіктің өзі орны толмас трагедияға әкеліп соқтыруы әбден мүмкін еді.
Нұрсұлтан Әбішұлы ашуды ақылға, асығыстықты сабырға жеңдіріп, әліптің артын бағып, аңысын аңдудың нәтижесінде, Қазақстанды ешқандай қателікке ұрындырмай тәуелсіз мемлекет етті. Елбасына бұл жолда батыл қимылдау үшін бүкілхалықтық мандат керек еді. Осылайша, 1991 жылдың 1 желтоқсанында ел тарихындағы тұңғыш Президенттік сайлау өткізіліп, онда халықтың 98 пайыздан астамы Нұрсұлтан Әбішұлына қолдау білдірді. Алғашқы сайлауға бәріміздің бір адамдай жұмыла қатысқанымыз әлі есімде. Біз алдағы болашақты сол жолы Елбасының қолына сеніп тапсырдық және оның дұрыс қадам болғанын нақты сезіндік.
Нұрсұлтан Назарбаевтың «Алдымен – экономика, содан кейін – саясат» ұстанымын ұстануы Қазақстанның қарыштап дамуына жол ашты. Егемендіктің елең-алаң шағында Қазақстанды экономикалық жаңғыруға, инфрақұрылымды жаңарту және шикізатқа тәуелділіктен арылтуға бастауы да сондықтан. Бұл ретте талай кәсіпорынның тынысын ашқан индустрияландыру реформасын атап өтпеске болмайды. Қазақстан өзінің өнеркәсіптік базасын дамытуға иек артып, индустриялық-инновациялық дамудың үш бағдарламасы қабылданды. Соның нәтижесінде 9 триллион теңгеге 1 500 жоба жүзеге асырылды. Қазақстан бұрын өндірілмеген өнімдер – электровоз, автобус, автомобиль, темір жол вагондары, трансформаторлар және басқа да 500-ден астам өнім түрін шығара бастады. Осы бағдарламаның нәтижесінде, өзім тұрып жатқан Екібастұз қаласы да дамудың даңғыл жолына түсті, Қазақстандағы темір жол кластері қалыптасқан шаһарға айналды.
Бас басылым арқылы халқымен ой бөліскен Елбасымыз аман, еліміз тыныш болсын! Тәуелсіздіктің тойы құтты болсын!
Рышат ӘМІРЕНОВ,
Қазақстанның Еңбек Ері
