Туған өлкені түлетпек

Катонқарағайдан шыққан кәсіпкерлер бұл мақсатқа 2,3 миллиард теңгенің қаржысын салуды көздеп отыр Шығыс Қазақстан облысында бірнеше жыл бұрын «Туған жерге – тағзым», «Туған елге – тарту» атты акциялар өткізіліп, облыс орталығында, аудандарда осы өңірден шыққан ғылым, мәдениет, әдебиет саласының көрнекті қай­рат­керлері, өнер саңлақтары өз­дерінің кір жуып, кіндік кескен туған жерлерінде бас қосып, әр­түрлі ша­ра­­ларға қатысып, туған аудандарын ұлықтауға атсалысқан еді. Оларды шалғайдағы жергілікті тұрғындар қызу қолдап, ел мақта­нышына айналған өнер, білім сала­­ларының қайраткерлерімен кез­десу­ге арналған шараларға белсене қатысқан. Жақында облыс орталығы Өс­ке­мен қаласындағы Достық үйін­де Катонқарағай ауданының инвес­тициялық форумы «Туған елге – тарту» деген атпен өткізілді. Форум жұмысына Шығыс Қазақстан облысы әкімінің орынбасары Ж.Омар, катонқарағайлық жазу­­шы Д.Әшім­ханұлы, сон­дай-ақ, Астана, Алматы, Шым­кент, Өскемен қалалары мен облыс аудандарынан келген бір топ кәсіпкер қатысты. Аудан әкімі Дәурен Тілеу­баев форумды аша отырып, жиналғандарды ауданның негіз­гі әлеуметтік-эко­но­микалық көр­сеткіштерімен та­ныс­тырды және кәсіпкер жерлес­теріміздің назарын қандай ба­ғыт­тарға инвестиция салуға бола­тындығы туралы мәселелерге аударды. Катонқарағайдан шыққан кәсіп­керлер бұл мақсатқа 2,3 миллиард теңгенің қаржысын салмақ. Мемлекет шалғайда жатқан ауылдарды дамытуға қаржы жағынан үлкен көмек көрсетуде. «Жұмыспен қамту-2020», «Сыбаға», «Жай­лау» секілді мемлекеттік бағ­дарламалар жүзеге асырылу­да. Осы бағдарламалардың көме­гі­мен жүздеген қосымша жұмыс орындары ашылуда. Алайда, бұл жұмыстардың көпшілігі нау­қандық, маусымдық немесе уақытша жұ­мыстар болып, тұрғындарды, әсі­ресе, ауданнан кетіп жатқан жас­­тарды тұрақтандыру пробле­маласын түпкілікті шеше алмау­да. Қазіргі кезде аудандағы де­мо­графиялық жағдай өте өткір. Аудан мектептеріндегі оқушылар саны жыл сайын 300 балаға азаю­да, бір кезде аудан орталығы болғанда 10 мыңнан астам адам тұратын Катонқарағай ауылында қазір 4600-ақ адам қалған. Шекаралық ауданның мұндай күй кешіп отыруы әркімді ойлан­дыруы тиіс. Сондықтан да, біздің бүгінгі кез­десуіміздің басты мақ­саты – сіздерді қызықтыра отырып, қаржыларыңызды туған аудан­дарыңызға салуға, сөйтіп, жаңа өндіріс көздерін, жастар үшін қо­сымша жұмыс орындарын ашуға тарту. Ауданда іскер, белсенді адамдар үшін инвестиция салатын қызмет аясы жеткілікті. Атап айтқанда, олар – ауылшаруашылық өнімдерін қайта өңдеуден өт­кізу, туризм, энергетика, сана­торий-курорттық сауықтыру, Катонқарағайдың брендіне айналып, ерекше жарнамалауға ділгер болып отырған қымыз бен балды арнаулы ыдыстармен, сыйымдылығы әртүрлі құтылармен шығару. Орасан бай өсімдіктер дүниесі фармацевтиканы дамытуға қолайлы. Күш-жігер жұмсауға тұрарлық басқа да бағыттар аз емес. Таңдаған жо­ба­ларыңызды табысты жүзеге асыруға біздің тарапымыздан барынша күш-көмек көрсетіледі, деп атап көрсетті Д.Тілеубаев. Форумда Катонқарағай ұлттық табиғи паркінің, облыстық ауыл шаруашылығы басқармасының, тұрғын үй-коммуналдық шаруа­шылық, энергетика, туризм салала­рының, Катонқарағай ауданаралық ауруханасының өкілдері бірлесе, ынтымақтаса жұмыс істеу жөнін­дегі өз ойларын ортаға салды. Бизнесмендер талқыланып отыр­ған мәселеге өз тараптарынан қы­зығушылықпен ынта білдіре атсалысты. Облыстық мәслихаттың депутаты Лұқбек Тумашинов өз әріп­тестерін болашақта үлкен нәти­же­лерге қол жеткізетін шағын болса да нақты істен бастауға шақырды. Марат Татаев белгілі бір уа­қыт­тан соң тағы да жиналып, аудан­­ға инвестиция тарту жөнін­дегі атқарылып жатқан істерге қо­ры­тынды жасап отыруға ұсыныс жасады. Форум жұмысы соңында кәсіп­керлер Катонқарағай ауданы­ның әкімімен кәсіпкерлердің мал ­шаруа­шылығын дамыту, туристік базалар, шағын ГЭС-тер салу, балды құтыларға құйып шығару, Қаратай батырға ескерткіш орнату туралы жеті түрлі меморандумға қол қойды. Қайырды НАЗЫРБАЕВ. Шығыс Қазақстан облысы.