Тәуелсіздік құрдастарының жасампаз жобалары

Қазақстанның атын шығаратынына сенемін

Тәуелсіздікті бостандық, күш және рухани байлық деп түсінемін. Желтоқсанның ек­пі­ні­мен келген егемендіктің қа­шанда орны бөлек.

Биылғы Тәуелсіздігіміздің 30 жыл­дық төл мерекесіне орай «Тәуелсіздік ұрпақтары» гран­тына ұсынып отырған жобам «(Анти) коммутаторларға қа­тыс­ты ерекше алгебралардың құры­лымдық мәселелері» деп ата­лады. Біріншіден, бұл жоба мате­ма­тиканың алгебра бағытына ең алғаш қазақ тілінде Төрткен және Төртқара терминдерін енгіз­ген әйгілі академик Асқар Жұма­діл­даевтың 2007 жылы жарық көрген ғылыми мақаласында аталып өткен теорияларға негізделіп, те­реңірек зерттеуге бағытталды. Бұл жобаның нәтижелері теория­лық сипатқа ие және математика бағытында ғана емес, физи­ка­ның көптеген ашылуында қол­данысқа жарайды деген болжам күтілуде. Сондай-ақ зерттеу нәтижелері рейтингтік журналдарда жа­рия­ланады. Бұл нәтижелер Қазақстанның ғалымдары үшін алгебра бағытын ілгерілетуге қыз­мет етіп, Қазақстанның атын әлемдік деңгейге шығаратынына сенемін.

Бұл грант біз сияқты жас ғалым­дардың артық дүниелерге алаң­дамай, уақытымыз бен күші­мізді тек ғылымға арнауға зор мүм­кіндік беріп отыр. Сол се­бепті осындай мүмкіндік беріп, қолдап жүрген мемлекетіміз бен Президентімізге ризашылығым­ды білдіремін! Сонымен қоса, мені бакалавр дәрежесінен бері бар білгенін аямай үйретіп, осындай жетістіктерге жетуге себепші болған ғылыми жетекшілерім Асқар Жұмаділдаев пен Нұрлан Исмаи­ловқа да алғыс айтқым келеді.

 

Фарух МАШУРОВ,

Сулеймен Демирел университетінің аға оқытушысы, Қазақ-Британ техникалық университетінің

3-курс докторанты

 

Арманымызға қанат бітірді

«Бұлақ көрсең, көзін аш» демекші, Президен­тіміздің бастамасымен жүзеге асырылған «Тәуел­сіздік ұрпақтары» жобасы 30 жастың жігерін жанып, армандарына қанат бітірді.

Сол жастардың қатарында өзім де бармын. Аталған байқауға «Тотыққан кобальт-никелі бар кеннен кобальт пен никельді кешенді бөліп алу технологиясын әзірлеу» тақырыбындағы жобамды тапсырдым. Бұл жобамда кобальт үшін кемінде 90% және никель үшін 95% бөліп алу дәрежелері болатын өңделуі күрделі тотыққан кендерден кобальт пен никельді кешенді бөліп алудың жаңа технологиясын әзірлеуді көздедім. Аталған технологияда зерттеулер салыстырмалы түрде улағыш дәрежесі төмен, арзан және қолжетімді реагенттерін (ноу-хау) пайдалану арқылы бөлме температурасында жүргізіледі. Соның нәтижесінде барлық технологиялық процесті арзандатуға, жеңілдетуге және пайдалануда күрделі аппаратуралық ресім­деуді болдырмауға мүмкіндік береді.

Экологиялық және экономикалық артықшылықтарға ие әрі өте қызықты жоба. Академик, профессор Х.Оспановтың басшылығымен метал­дарды гидрометаллургиялық жолмен тиімді бөліп алу әдістерін зерттедім, сол бағыттағы жұмыстарды одан әрі дамытқым келді. Қазіргі кезде профес­сор Бағдәулет Кенжалиевтің қарамағында Satbayev University жанындағы Металлургия және кен байыту институтында кіші ғылыми қызмет­кер болып жұмыс істеймін. Институтта жас ғалым­дардың ғылыммен айналысуына барлық жағдай қарастырылған, бұл болашақта тың зерттеулер жүргізуге мүмкіндік береді.

Мінеки, жоғарыда аталған жобамызды әрі қарай дамытуға қолдау бар. Ендігі жерде білімді ұрпақ тәрбиелеп, мемлекетімізді дамыту жолында еңбек етуге дайынбыз.

 

Кенжеғали МАМАНҰЛЫ,

Satbayev University жанындағы

Металлургия және кен байыту институтының

кіші ғылыми қызметкері

 

Асқақ мұрат алға жетелейді

Осыдан жарты жыл бұрын грантқа құжат­тарымды тапсыр­ған кезде жеңімпаз болатынымды мүлдем ойла­маған екенмін. Бұл мен үшін зор мәртебе және ұмы­тылмас тарихи сәт десем, артық айтқандық емес. Ең алғашқы еңбек жолымды Қарағандыда баста­сам, бүгінде елордадағы «Қазақ ұлттық өнер универ­ситеті» колледжінің оқытушысымын, «Актерлік өнер» мамандығы бойынша сабақ беріп, сапалы жұмыстар атқаруға талпынып келемін.

Жастарымыздың танымы те­рең тұлға болып қалыптасуы үшін мәдениеттің орны ерекше. Осы орайда өскелең ұрпақты театр өнеріне қызықтыру мақсатында «Театр. Шығармашылық. Талант» жобамен әзірледім.

Біз бұл жобаның аясында балалар мен жеткін­шектерге арналған халықаралық театр фести­валін ұйымдастырамыз. Мұндай сайыс өрен­дері­міздің өнер көкжиегін кеңейтеді, ұлттық құндылық­тары­мызды ұлықтап, отансүйгіштікті дәріптейді. Актер­ліктің қыр-сы­рын ұғынуға мүмкіндік береді. Ең бас­тысы, алдына асқақ мақсат қоюға жетелейді.

Келешекте фестивальға қатыс­қан жеткіншек­теріміздің арасынан Қазақстанның өнер қайрат­кер­лері шығатынына сенімдімін. Ар­маным – болашақта балалар ой­най­тын театр ашып, елімізді мә­де­ниет, театр арқылы әлемге әйгілі ету.

Егемендіктің мерейлі жылын­да дарынды жас­тарға арнайы грант тағайындап, талабымызды қуат­тап отырған Президентіміз Қасым-Жомарт Кемелұлына зор ризашылығымды білдіреміз.

 

Думан ӘКІМ,

«Тәуелсіздік ұрпақтары» грантының «Мәдениет» бағыты бойынша жеңімпазы

 

Жастарға тың серпін берді

Президентіміз Қасым-Жомарт Кемелұлы Тоқаев­тың білімді, шығармашыл, бастамашыл жастарға үнемі қолдау білдіріп келе жатқаны бізді өте қатты қуантады. Бағым жанып, «Тәуелсіздік ұрпақта­ры» грантына еліміздегі талантты жас­тар­мен бірге  мені де лайық деп танығанда, ғала­мат күйді бастан кештім. Мемлекетіміз тарапынан жастарға жасалып жатқан шарапатты шын сезін­гендей болдым.

«Ұрпақ – ұлт болашағы» десек, келешегіміз үшін Президенттің жасап жатқан жарқын бастамалары қашанда біздей жастар үшін тың серпін берері сөзсіз. Бұл грантты жеңіп алу қаншалықты үлкен қуаныш болса, оның жауапкершілігі де соншалықты зор. Оны өз басым анық сезінемін және алдағы уақытта бұдан да жемісті жобалар жасауға барымды саламын.  Өйткені біз тәуелсіздіктің құрдасы ғана емес, егеменді елдің ертеңіміз деп батыл айта аламын. Біздің әрбір жетістігіміз – ұлтымыздың кемел келешегінің кепілі. Сондықтан да талмай, тынбай еңбектеніп, еркін елдің ертеңі, жарқын болашағы үшін аянбай тер төгеміз. Өйткені біздің жеткен әрбір жетістігіміз Тәуелсіздікке жасаған үлкен тартуымыз болмақ. Өзгелер қазақ жастарын кемел білім, жарқын бастама, ұшқыр ой, жемісті жобалар арқылы танып жатса, бұл да Мәңгілік елдің іргесін берік, келешегін нұрлы етер жемісті қадамдардың бірі деп санаймын.

 Осынау тарихи кезеңде өмірге келіп, Тәуел­сіздікпен құрдас болып қана қоймай, ата-бабаларымыз ғасырлар бойы аңсаған азаттықтың ақ таңын көзімізбен көру бақыты бұйырған буын – біз шын мәнінде бақытты ұрпақпыз. Ал бабалар аманатына адал болу –   біздің ғұмырлық парызымыз. Сол жолда тынбай еңбектенеміз. Жас­тардың жанына жалын, бастамасына тың сер­пін сыйлаған Президентімізге осы үшін де зор алғы­сымды білдіремін. Бізге үміт артқан Мағжандай баба­ларымыздың сеніміне дақ түсірмей, еліміздің ертеңі үшін адал еңбек ете алсақ, әр жетістігімізбен ұлтымыздың дамуына тамшыдай болсын үлесімізді қоса алсақ, бізден асқан бақытты жан болмақ емес.

 

Әлиғазы АЙДАРХАНОВ,

Hi School онлайн білім беру

орталығының жетекшісі