Велоклубпен екі маусымға келісімшарт жасаған Нұрберген велоспорттан 23 жасқа дейінгілер арасындағы топтық сайыс бойынша қазіргі Қазақстан чемпионы саналады. Сондай-ақ ол еуропалық беделді жарыстарда жасөспірімдер және жастар деңгейінде айтарлықтай тәжірибе жинақтап үлгерген. Жасөспірімдер мен жастар арасындағы әлем чемпионатында, жастар арасындағы «Джиро д’Италияда» және беделді «Тур де л’Авенир» веложарыстарында өнер көрсетті. Осындай басты нәтижесінің арқасында Astana Qazaqstan Team басшыларының көзіне түсіп, командаға шақырту алды.
«Аstana Qazaqstan Team велоклубында өнер көрсету туралы ұсыныс мен үшін күтпеген жағдай болды. Әлем чемпионатынан кейін Федерация президенті Нұрлан Смағұлов пен команданың бас менеджері Александр Винокуров хабарласып, маған клуб сапында өнер көрсетуге мүмкіндік бергісі келетіндерін айтқанда айтарға сөз таппай қалдым. Бір жағынан өте қатты қобалжып әрі қатты қуандым. Осы ұсыныстан кейін үш күн ұйықтай алмадым десем де болады. Себебі неше түрлі ой мазалады. Сенімді ақтай алмасам қалай болады, велоспорт әлемін түгел таныған атақты спортшылармен бір пелотонда болудың өзі мен сияқты спортшылар үшін үлкен жетістік қой. Бірақ сол мүмкіндікті абыроймен пайдалана аламын ба деген ой мазалады. Әлем чемпионатында біз Франция құрамасымен бір қонақүйде болдық. Сол кездегі әлем чемпионы Жюлиан Алафилипптің өзін көргендегі көңіл күйім бұл жерде түкке тұрмай қалды. Нұр-Сұлтан қаласында өткен тұсаукесерде алғаш рет Astana Qazaqstan Team жейдесін кидім, командаластарыммен жақынырақ таныстым. Нибали, Лопес сияқты майталмандармен бір сапта тұрдым. Әлі де қобалжу бар, қорқыныш та бар. Бірақ қазіргі бар ойым ел сенімін ақтау, бапкерлер сенімінен шығу. Ол үшін аянып қалмаймын», дейді Нұрберген.
Нұрберген биыл Қазақстан чемпионатының топтық жарысында мәреге бірінші келді. Жасөспірімдер арасындағы ел чемпионатында жүлделі орындарды иеленіп, «Балтик-Карконоше» турының кезеңдік жарысында (2019 ж.) 4-нәтиже, «Тур де ДМЗ» жарысында (2017 ж.) жалпы есепте 9-нәтиже көрсетті.
«Мен – Тараз қаласының тумасымын. Бала кезімнен жүзу спортымен айналыссам да, велоспорт жарыстарын үзбей қарайтынмын. Әсіресе жаз маусымында әйгілі «Тур де Франс» додасының бірде-бір кезеңін жібермейтінмін. «Астана» жазуы бар жейдені киген Винокуров, Фофоновтың өнеріне тәнті болдым, қатты қызығатынмын. Ағам екеуміз баратын жүзу бассейнінің жанында велоспорт секциясы жұмыс істейтін. Бір күні жаттығудан шығып келе жатсам, секция алдына велосипедтерді тізіп қойыпты, шыдамай ішке кірдім. Қызметкер механик екен, маған «ертең таңертең сегізде кел» деді. Сол күннен бастап велосипед сенімді серігіме айналды. Маған қатты ұнады. Ал жарыстарға қатысып, жүлделі орындардан көріне бастағанда таңдауым дұрыс болғанын түсіндім. Сөйтіп алдыма белгілі бір жетістікке жетуім керек деген мақсат қойдым. Қазір жасым 21-де, велосипедті тізгіндегеніме 10 жылдан асты. Ел ішіндегі жарыстарға Жамбыл облысы құрамасымен шығамын», дейді жас шабандоз.
Нұрберген классикалық және дөң жолдарда өтетін жарыстарға машықтанған. Оның келер маусымда қай жарысқа қатысатыны Испанияда өтіп жатқан команданың жаттығу жиынынан кейін белгілі болады. Спорттық мансабында үлкен қадам жасаған жас шабандоздың көңілі қобалжып, ерекше толқулы. Онысы түсінікті де. Әлемдік турға Astana командасымен бару бала күнгі арманы. Бұдан бөлек Әлемдік тур деңгейі жоғары, ерекше дайындық пен табандылықты талап етеді.
«Басты жанкүйерім – әкем. Маған қолдау көрсетуден еш жалыққан емес. Әрине бұл спорттың өзіндік қиындықтары бар екенін, жарақаты көп екенін ол да, мен де жақсы түсіндік. Отбасымызда жалғыз ұлмын. Бірақ менің таңдауым велоспорт болғанына қарсылығын білдірген жоқ. Бұғанамды сындырып алғанда, операция жасалды. Әкем осындай сәттерде қасымда болады. Жарыс қай қалада болсын, жанкүйерлер арасынан табасың. Сондықтан жарыстан тыс уақытта үйде болып, анама, әкеме көңіл бөлуге тырысамын», деп сөзін түйіндеді Нұрберген.
Тараздық спортшы осындай мүмкіндік берген Александр Винокуров пен Велоспорт федерациясының президенті Нұрлан Смағұловқа алғысын білдірді. Алғашқы бапкері Вячеслав Непомнящих пен Александр Шушемоин басқаратын Vino – Astana Motors командасының бапкерлер штабының тәрбиесіне де дән риза. Бір қызығы, француздар, шетелдік мамандар оның есімін айна қатесіз айтады екен. Мұны мен жақсылыққа жорыдым, дейді спортшы.
