Ал облыстық полиция департаменті халықтың қауіпсіздігі мен тыныштығын қамтамасыз ететін жедел шараларды қабылдауда. Департаменттің баспасөз қызметінің хабарлауынша, арнайы жедел-тергеу тобы бүлікке қатысқан 38 адамды анықтады. Олардың арасында 5547 әскери бөлімі сарбазының өліміне күдікті де бар. Қазір осы дерек бойынша сотқа дейінгі тергеп, тексеру басталды. Сарбаз өліміне қатысы бар азаматтың Қызылорда қаласының 31 жастағы тұрғыны екендігі айтылып отыр.
Полицияға жеткізілгендерден 3 атыс, 13 суық қару, 8 қалқан мен 4 дулыға, бес резеңке сойыл тәркілеген. Колл-орталыққа 4 432 қоңырау түсіпті. Орталыққа тұрғындардың көпшілігі әуе, теміржол билеттерін қайтару, интернетті қосуға байланысты хабарласқан. 5 қаңтардан бастап 204 адам медициналық көмекке жүгінсе, 48 тұрғын ауруханаға жатқызылған. Олардың 10-ы жансақтау бөлімінде жатыр.
Өңірдегі азық-түлік қоры жеткілікті. Дәл қазір тұрақтандыру қоры қоймасында 1 448 тонна өнім бар. Аймақта 34 әлеуметтік дүкен қалыпты жұмыс істеп тұр. Апта сайын 120 көлік көршілес Түркістан қаласынан азық-түлік тасымалдайды. Газ бен жанар-жағармай да жеткілікті. Осы күні сұйытылған газ – 60-65, АИ-92 маркалы бензин – 180, ал дизель 229 теңгеден сатылып жатыр.
Шағын және орта бизнес те қалыпты жұмыс ырғағына көшті. Бүгінде облыс аумағында 17 базар, 89 ірі сауда үйі, 129 жанар-жағармай бекеті, 359 дәріхана желісі мен азық-түлік дүкендері жұмыс істеп тұр.
Облыстық кәсіпкерлер палатасы баспасөз қызметінің мәліметінше бұзақылық салдарынан қала орталығындағы 26 нысанға 395,4 млн теңге залал келген. Палата мен кәсіпкерлік және туризм басқармасына облыс орталығындағы 15 кәсіпкер осындай шағыммен хабарласқан.
Қызылорда облысы
