Төрт мықты ойнайды

Шағын футболдан УЕФА Кубогының финалдық кезеңіне жеребе тартылды. Әзербайжан астанасы Баку қаласында өткен жеребе тарту рәсімінің қорытындысы бойынша Алматының «Қайраты» УЕФА Кубогының жартылай финалында Мәскеудің «Динамо» командасымен кездесетін болып шешілді. Ал, екінші жұпта әзербайжандық «Араз» клубы мен испандық «Барселона» командалары ойнайтын болады. «Қайрат» пен «Динамо» арасындағы жартылай финалдық кездесу 24 сәуір күні өтсе, «Араз» бен «Барселона» арасын­дағы матч та сол күні өтеді.  Ал үшінші орын үшін өтетін кез­десу 25 сәуір күні болса, финал 26 сәуір күні Бакуде өтеді. Былтыр УЕФА Кубогын «Қайрат» командасының жеңіп алғанын білеміз.  Сондықтан алматылық клубтың тағы да шағын футболдан кәрі құрлықтың басты кубогын елге алып келеді деген үміттеміз. Осы жерде бір айта кететін нәрсе, былтыр «Қайрат»  осы кубокты жеңіп алғаннан бастап ресми матчтарда да жолдастық кездесулерде де жеңілмей келеді. Дастан КЕНЖАЛИН, «Егемен Қазақстан».