Жетісу: жағдай тұрақталды ма?

Жалпы, жаппай тәртіпсіздік кезінде Алматы облысында 337 адам медициналық көмекке жү­гінгені анықталды. Оның ішінде жарақат алғандардың 13-і әскери қызметкер. Оқиғада зардап шеккендер қатары Талдықорған қаласында көп болып тұр. Осы күндері облыс орталығындағы көп салалы ауруханаға 114 адам көмек сұрап жүгінген.

– Біздің мекемеге зардап шеккен 114 адам жүгініп, оның 25-і ауруханаға жатқызылды. Қалғандарына тиісті амбула­то­р­лық ем жасалды. Күрделі кезеңде ауруханада дәрігерлердің күшейтілген бригадасы жұмыс істеп, зардап шеккендерге жоға­ры деңгейде медициналық кө­мек көрсетті. Қазір ауруханаға түскен 25 адамның 15-і жазылып шықты. Операция жасалған 10 адам оңалту ем шараларын қабылдауда. Олардың денсаулығы бірте-бірте түзеліп келеді, – дейді Талдықорған қалалық көп салалы ауруханасының директоры Жұмахан Молдағұлов.

Айтпақшы, Алматы облысы­ның әкімі Қанат Бозымбаев атал­ған көп салалы ауруханаға барып, бүлік кезінде зардап шеккен азаматтардың денсаулық жағдайын білді. Әкім жараланған қарапайым азаматтармен және күштік құрылымдар өкілдерімен тілдесті. Қызметтік міндеттерін адал орындап, қайсарлық пен батырлықтың үлгісін көрсет­кендері үшін әскери мамандарға алғыс білдірді. Олардың отбасыларына барлық қажетті көмек көрсетілетінін айтты.

Өкінішке қарай, жетісулықтар «қаңтар қырғыны» кезінде қаза болған жерлестерін жер қойнына тапсырып жатыр. Соның бірі Алматы қаласындағы жаппай тәртіпсіздікке тойтарыс кезінде бұзақылар қолынан мерт болған шекара қызметінің арнаулы мақсаттағы ұтқыр іс-қимылдар тобының техник-жүргізушісі, 22 жастағы Шавкат Армидинов болатын. 2000 жылы 21 шілдеде Ұйғыр ауданы, Үлкен Диқан ауы­лында дүниеге келген жас жауын­гер 2020 жылы Қордайдағы шекара бекетінде әскери борышын өтеп, кейіннен сол бөлімде келісімшартпен қызметке қалаға кеткен. Жақында Отан алдындағы борышына адал болып, ел тұтастығын сақтау жолында ерлікпен қаза тапқан жас ұланның денесі өзінің туған жері – Үлкен Диқан ауылына жеткізіліп, аудан жұртшылығы оны ақтық сапарға шығарып салды.

Сондай-ақ жаппай тәртіпсізік салдарынан облыстағы 120 кәсіп­керлік нысаны зардап шеккен көрінеді. Негізгі шығынға батқан кәсіпкерлер Талдықорған қаласы, Қарасай, Жамбыл, Ақсу аудандарынан анықталған. Алдын ала есептеулер бойынша келтірілген залалдың жалпы сомасы 8,5 млрд теңгеден асып отыр. Мәселен, облыс орталығында «Қарағаш» сауда үйі мен ондағы 5 бутик, Sulpak тұрмыстық техника дүкенінің 3 желісі, 2 Technodom техника дүкені, Small супермаркеті, полиция департаменті мен облыс әкімдігінің асханалары зардап шекті, Қарасай ауданында «Апорт» сауда және ойын-сауық орталығында 70-ке жуық дүкен мен бутик және «Алтын орда» базарының 20-ға жуық сауда дүкені, сондай-ақ 2 жанармай бекеті, Ақсу ауданында 1 кәсіпорын, Жамбыл ауданында 1 жанармай құю стансасы және басқа да нысандар тоналып, өртелген.

Алматы облысы