Инфографиканы жасаған Амангелді Қияс, «ЕQ»
Ұлттық банктің хабарлауынша, әлемнің ірі экономикаларында және негізгі сауда әріптес елдерде инфляция әлі де жоғары күйде қалып отыр.
«АҚШ-та инфляция 1982 жылдан бастап алғаш рет 7,0%-ға дейін көтерілді. 2021 жылғы желтоқсанда ЕО-да тұтынушылық инфляция 5,3%-ға дейін, Германияда 1992 жылдан бастап алғаш рет 5,7%-ға дейін өсті. Қытайда бағаның өсуі 2021 жылғы қарашада 15 айлық ең жоғарғы көрсеткішке жетті (2,3%), содан кейін 2021 жылғы желтоқсанда 1,5%-ға дейін төмендеді. Ресейде инфляция 2021 жылғы желтоқсанда бұрынғы жоғары, 8,4% деңгейінде қалды. Қазақстанда 2021 жылғы желтоқсанда жылдық инфляция 8,4%-ға дейін төмендеді. Азық-түлік инфляциясы 2021 жылғы желтоқсанда елеулі түрде төмендеп, жылдық көрсетуде 9,9% болды. Бұл инфляцияға қарсы ден қою шараларын іске асыруға және жекелеген азық-түлік тауарларына жоғары айлық мәндердің жылдық инфляция есебінен шығуына байланысты. Сүт өнімдерінің, жұмыртқа, май, қант пен көкөністердің жылдық дезинфляциясы байқалып отыр. Осыған қарамастан, жеміс-көкөніс өнімі құнының жылдық өсу қарқыны әлі де жоғары деңгейде болып отыр», дейді Ұлттық банк мамандары соңғы деректерді келтіре отырып.
Инфляциялық күтулер біршама төмендеуге қарамастан жоғары деңгейде қалып отыр. 2021 жылғы желтоқсанда бір жыл бұрынға инфляцияны сандық бағалау 10,3% болыпты. Респонденттердің басым көпшілігі (66%) бұрынғыша қазіргі баға өсуінің келесі 12 айда сақталады не жеделдейді деп санайды.
«Экономиканы қолдаудың мемлекеттік бағдарламаларын іске асыру нәтижесінде ақшалай ұсыныстың едәуір ұлғаюы экономикадағы инфляцияға қарсы қысымға алып келеді және валюта нарығының тұрақтылығына теріс әсер етеді. Осы бағдарламаларды іске асыру экономиканың пандемияға дейінгі деңгейге дейін қалпына келуін жылдамдатты, бірақ сонымен бірге 2020 жылдың басынан бастап ақша базасының 11 трлн теңгеге дейін 1,6 есе кеңеюіне алып келді, сол кезеңде ақша массасы 30,1 трлн теңгеге дейін 41,2%-ға ұлғайды. Осы фактордың инфляцияға әсерін төмендету үшін Ұлттық банк экономиканы қолдаудың мемлекеттік бағдарламаларынан шығуды бастап, 2021 жылы 5 қаржыландыру бағдарламасын аяқтады (Кәсіпкерлерді жеңілдікпен кредиттеу бағдарламасы, Жұмыспен қамтудың жол картасы, Нұрлы жер, Жеңілдікпен автокредиттеу бағдарламасы және «Баспана хит» ипотекалық бағдарламасы). 2022 жылы «Қарапайым заттар экономикасы» бағдарламасын және «7-20-25» ипотекалық бағдарламасын қаржыландыруды аяқтау жоспарланып отыр», деп жазады Ұлттық банк.
Инфляция процестерінің өсуі аясында дамыған экономикалар өз саясатын күшейтуді жалғастыруда. 2021 жылы әлемнің орталық банктерінің барлық шешімінің 78%-ы ақша-кредит талаптарын күшейтуге бағытталған болатын. Тұтыну бағасының өсуін тұрақтандыру үшін ФРЖ басшысы АҚШ Сенатындағы тыңдауларда олардың 2022 жылғы наурызда активтерді сатып алуды тоқтататыны туралы мәлімдеді. Осының аясында нарық қатысушылары биылғы наурыздан бастап 2022 жыл ішінде мөлшерлеменің 3-4 рет көтерілуін күтеді.
«Дүниежүзілік банктің бағалауы бойынша тұтыну бағаларының жаһандық инфляциясы 2022 жылдың бірінші жартысында ең жоғары деңгейге жетіп, одан кейін 2023 жыл ішінде біртіндеп төмендейді. Әлемде инфляцияның төмендеуіне жаһандық өсудің баяулауы және шикізат тауарларын жеткізудің кеңеюі ықпал ететін болады. Әлемдік экономикадағы ахуалдың дамуын және Қазақстандағы қазіргі ішкі факторларды ескере отырып, жаңартылған болжамға сәйкес Ұлттық банк 2022 жылдың қорытындысы бойынша инфляцияның 6-6,5% деңгейіне дейін одан әрі баяулауын күтуде. Бұл ретте, биыл қаңтардың басында Қазақстанда болған қайғылы оқиғаларға және 2021 жылдың 1-жартысындағы салыстырмалы түрде төмен базаға байланысты инфляциялық процестердің өсуі ықтимал, оның негізгі қысымы биылғы I тоқсанға келеді. II жарты жылдықта ӘМАТ, ЖЖМ және коммуналдық қызметтер бағасын уақытша реттеу шараларының қолданылу мерзімі (180 күн) өткеннен кейін инфляцияның жылдамдау тәуекелі ұлғаяуы мүмкін», дейді Ұлттық банктің ақша-несие саясаты комитеті.
Тәуекелдердің қазіргі теңгерімі, азық-түлікке жатпайтын құрамдас бөліктің жеделдеуіне байланысты 2021 жылдың соңында инфляция баяулауының тұрақсыздығы, сондай-ақ инфляциялық күтулердің артуы негізінде Ұлттық банк ақша-кредит саясатын күшейтуді жалғастыруда.
«Үкімет әзірлеп жатқан Инфляцияны бақылау жөніндегі шаралар кешенін тиімді іске асырумен бірге Ұлттық банктің дезинфляциялық ақша-кредит саясаты 2022 жылға белгіленген 4-6% мақсатқа сәйкес инфляцияны төмендетуге мүмкіндік береді», дейді Ұлттық банк мамандары.
Қазақстан Республикасының Ұлттық банкі Ақша-кредит саясаты комитетінің базалық мөлшерлеме бойынша кезекті жоспарлы шешімі 2022 жылғы 9 наурызда Нұр-Сұлтан қаласының уақыты бойынша 15:00-де жарияланатын болады.
