Бүгінде қалаға қатысты мақтау емес сын көп айтылады. Облыс орталығына жақындаған қаланың тамырына қан жүгіріп, жайқала түсуге тиіс болатын. Бұл мақсаттағы жоспарлар да бар. Дегенмен қала тұрғындарының арыз-шағымдары мен ой-пікірлері Кентаудың абыройын асқақтатар істерді үйлестіріп, ұйымдастырар іскер де жанашыр басшының жоқтығын білдіреді.
Қала әкімінің өзі де қызметінен босатуды өтініп, арыз жазыпты. Бірақ... Ретімен баяндасақ. Кентау қаласында көпқабатты үйлерді сапалы жылумен қамту соңғы жылдары шешімін таппай келе жатқан өзекті мәселеге айналған. Қыстыгүні дірдек қаққан тұрғындар пәтерлердің суықтығынан қабат-қабат киініп жүретіндерін, жиі ауыратындарын айтып шағымданады. Амалы таусылған кентаулықтар әр бөлмеде электр пешін пайдалануға мәжбүр. Бұл, әрине тиімсіз.
«Бізге берілмеген жылуға әр айда түбіртек келеді. «Төле» дейді, біз оны неге төлейміз? Тоққа төлейміз бе, жылуға төлейміз бе, мұздай үйге төлейміз бе?», дейді тұрғындар. Көпқабатты үй тұрғындарының бұл мәселені көтеріп жүргеніне де үш ай болыпты. Жылуға жауапты мамандар әуелде бірер күнде мәселе шешіледі деген. Кейін жылу батареясындағы ауаны шығара алмаған тұрғындарды кінәлаған. Бірақ жаураған жұрт құбырдағы ауаны күніне бірнеше мәрте шығаратынын айтады. «Кентау қаласы бойынша жылу маусымы проблема болып тұр. Әкім де, оның орынбасары да хабардар, ТЭЦ-тің бастығы да біледі. Бірақ ешқандай шешім жоқ. Бізді естіп жатқан жоқ», дейді қала тұрғыны Әлия Кенжебаева.
Тұрғындардың жиналып әкімдікке бармақ болғанын естіп, кездесуге келген жылыту орталығындағылардың да жауабы нақты емес. «Біздің жұмысымыз үйлердің жертөлесіне дейін жылу әкелу» деген олар үйдің астындағы жылы құбырларды көрсеткен. Бірақ пәтерлердің үстінде неліктен жылу жоқ дегенді сол күйі түсіндіре алмапты. Ашуға мінген тұрғындар әкімдікке емес, қала әкімінің үйіне баратындарын айтқан соң, жылыту орталығының директоры да бой көрсетті. «Кентау-Сервис» мекемесінің директоры Асхат Абдрасилов орталық жүйеге жер үйлер мен коммерциялық нысандар көптеп қосылып, соның салдарынан көпқабатты үйлерге қысым жетпей жатқанын айтады. Бұл мәселені бірер күнде шешуге тағы да уәде берген. Алдағы уақытта көпқабатты үйлерде тұратындар үшін жер үйлердегі тұрғындарды жылусыз қалдырамыз деген басшылар қосымша қоятын сорғыларға ақша қарастырып жатыр екен. Бірақ жылыту маусымы басталарда тәжірибе ретінде көпқабатты үйлердің біріне сондай сорғы қойғанымен нәтиже бермепті. Сондықтан кентаулықтар қондырғы қойғаннан үйлердің жылып кетеріне мүлдем сенбейді.
Жылу ғана емес, қалада ауыз су мәселесі де жиі көтеріледі. Кентау қаласына қарасты Шаштөбе ауылына осыдан бірнеше жыл бұрын ауыз су тартылған. Алайда тіршілік нәрі бірде болса, бірде жоқ. Амалы таусылған тұрғындар суды арықтан ішеді, кейбірі бөшкесін 5 мың теңгеден сатып алады. Ауылдағы жарықтың жағдайы да мәз емес. Ескі трансформатордың күші жетпейді.
Былтыр жылды облыс басшысына қызметінен кету жөнінде арыз берумен бастаған Кентау қаласының әкімі Дәурен Махажанов жергілікті ақпарат құралдарында жиі сыналады. Оған негіз де жоқ емес. Жоғарыдағы айтылған мәселелермен қатар Кентаудың тазалығы да сын көтермейді. Соңғы жылдары лас қалаға айналып бара жатқанын, күл-қоқыс тастайтын контейнерлерді әкімдіктің көшеге шығарып тастағанын облыстық экология департаментінің басшысы Уәлихан Қайназаров брифингте мәлім етті. Сол үшін Кентау қаласының әкімі Дәурен Махажановқа 100 айлық есептік көрсеткіш көлемінде әкімшілік айыппұл салынғаны да сол жиында айтылды. «Көгілдір отынның» жоқтығын айтқан, электр қуаты, ауыз су мәселесі көтерілген арыз-шағымдар легі толастаған емес. Қала тұрғындарының бізге жолдаған шағымында нақты мысалдар да келтіріледі. Мысалы, былтыр көктемде дауылдың салдарынан электр бағаналары құлады. Жылу орталығында электр қуатының болмауынан жылу беру тоқтатылды. Содан құбырлар қатып, тұрғындар суық баспаналарында бірнеше күн жылусыз отырды. Яғни қала әкімдігі төтенше жағдайға дайын емес болып шықты. Дәл осындай жағдай қарашада тағы қайталанған. Ал пайдалануға берілген 600 пәтерлік 10 көпқабатты үйде жылу жоқ болып шықты. Әкімдік жаңа тұрғын үйлерге жылуды газбен жұмыс істейтін автономды пештер арқылы беруді жоспарлаған көрінеді. Алайда «көгілдір отын» іске қосылмаған. Тұрғындар әкімдік әр пәтер иесіне екі электр жылытқыш құралын таратып беруден басқа амал таппағанын айтып, шағымданған болатын. Осылайша, коммуналдық мәселеге қатысты айқай-шуы жиі шығатын Кентауда тұрғын үй-коммуналдық шаруашылық және тұрғын үй инспекциясы басшысының үстінен «аса ірі көлемдегі бөтеннің мүлкін талан-таражға салу» бабымен қылмыстық іс қозғалды. Облыстық соттың баспасөз қызметі хабарлағандай және ақпарат құралдарында жариялаған ресми мәліметтерге қарағанда, бөлім басшысының қылмыстық ісі бойынша қазынаға келтірілген шығынның көлемі 58,8 млн теңгені құрайды. Осы арада Мемлекет басшысы Қасым-Жомарт Тоқаевтың бастамасымен бағынышты қызметкерлердің сыбайлас жемқорлыққа жол бергені үшін мемлекеттік органдардың бірінші басшыларының орнынан түсу институты енгізілгенін еске сала кетейік. Осыған орай қабылданған заңның жаңа редакциясына сәйкес, бірінші басшы оның тікелей бағынышты тұлғасына қатысты соттың айыптау үкімі күшіне енгеннен соң, күнтізбелік 10 күн ішінде немесе ақталмайтын негіздер бойынша қылмыстық іс тоқтатылғаннан кейін отставкаға кетуге міндетті. Мысалы, аудан әкімі өзінің орынбасарларына, аппарат басшысына, жетекшілік ететін аудандық атқарушы органдардың басшыларына, ауыл, кент, ауылдық округтердің әкімдеріне жауап береді. Кентау қаласының әкімі Дәурен Махажанов жоғарыда айтылған заңсыздыққа дейін де қызметінен босату жөнінде облыс әкіміне бір рет арыз жазған болатын. Оған Кентау қаласына қарасты Ескі Иқан ауылдық округінің әкімі Хасан Муслимовтың пара алды деген айыппен сотталуы негіз болған-ды.
Хасан Муслимов ауылдағы бір тұрғынның жерге қатысты мәселесіне оң қорытынды беру үшін 4 млн 150 мың теңге пара сұрап, оның 2 млн теңгесін алу барысында ұсталды. Сот оны 4 жылға бас бостандығынан айыру жазасына кесті. Үкім күшіне енген соң Дәурен Махажанов қызметінен босауға арыз бергенімен, сөгіс жазасымен қызметінде қалдырылған еді. Яғни облыс басшысы оған сенім артып, мүмкіндік берді.
Облыс басшылығының сенімі ақталмай отырғанын қала тұрғындарының әлеуметтік мәселелерді жиі көтеріп шағымдануы, тіпті әкімнің үйіне барып талап-тілектерін білдіруге талпынуы аңғартады. Бұл орайда кентаулық тұрғындар арасында да әкімді жергілікті халық өзі ұсынып, өзі сайлап, сенімді ақтамаса, өздері орнынан босататын заңды мүмкіндік жасалғанын қалайтындарын айтушылар аз емес. «Халық қаласа, хан түйесін сояды» дегенмен, халықтың талабын ескеріп, әкімнің әзірге орнын босата қояр ниеті байқалмайды.
