Талай додада қарсыластарынан айласын асырып, көк туды көкте желбіреткен спортшыларымыздың жеңісті һәм жемісті кәсіби мансабы туралы бәріміз жақсы білеміз. Алайда олардың алғашқы жеңісі мен жеңілісі туралы сұрай бермейтініміз бар. Каратэ спортынан екі мәрте Азия ойындарында топ жарған Гузалия Гафурова көптеген жарыста жеңістің биік тұғырынан көрінгені мәлім. Алайда алғаш рет жеңілістің кермек дәмін татқан кезде ол қатты мұңайған болатын...
«Алғашқы жеңісті ұмыту мүмкін бе екен? Ең алғашқы жеңісіме Қаратау қаласында өткен жарыста қол жеткіздім. Ол кезде менің спортпен шұғылдана бастағаныма бір ай да толмаған болатын. Бұл – менің бірінші жарысым. Ең бірінші турнирімде бірінші орын алғаным естен кетпейді. Балалық көңілмен өте қатты қуандым, бақыттан басым айналғандай күй кештім. Анашым да мәз болып, қуанышымды бөлісті. Сол күні Жамбыл облысының Байзақ ауданына қарасты Қызыл жұлдыз ауылындағы барлық көршілерім жиналып, алғашқы жеңісімді жақсы көңіл күйде атап өттік. Ол күнді ешқашан жадымнан шығармаймын. Ал ең бірінші жеңілісім Петропавл қаласында өткен жарыста тіркелді. Ол күн мен үшін күрсініспен еске алатын сәттердің бірі болып қала береді. Тұңғыш рет облыс аумағынан шығып, сыртта ұйымдастырылған жарысқа аттандым. Мені сол жарысқа жіберу үшін анашым бізге тиесілі жердің бір бөлігін сатып жіберді. Сөйтіп мені жалғыз жібермей, қасыма әпкемді қосты. Батасын беріп, шығарып салды. Сол кезде жан дүнием астан-кестен болып кетті. Сенім үдесінен шыға алмағаным үшін қатты өкіндім. Анашымның менің ешкімнен кем болмауым үшін жеріміздің жартысын сатып жібергенін ойлап тіпті күйзеліп кеттім. Ол кез есіме түссе, әлі де мұңаямын», дейді спортшы.
12 жасынан бастап каратэ спортын жанына серік еткен Гузалияның 2014 жылы Оңтүстік Кореяның Инчхон қаласында өткен Азия ойындарында топ жаруы заңдылық секілді көрінгенімен, 2018 жылы Индонезия астанасы Джакарта қаласында жалауы желбіреген Азия ойындарында одан көп адам алтын жүлде күтпеген болатын. Себебі де түсінікті ғой. Отбасын құрғаннан соң декреттік демалысқа кеткен еді. Алайда қызы алты айға толғаннан кейін тыныш жатпай, жаттығуды бастап кетті. Иә, елордадан Таразға қайта келді. Жаттықты. Шүмектеп төккен тердің арқасында екінші мәрте Азия ойындарының чемпионы атанды. Жарысқа аттанар алдында «қола жүлде алсам да жетеді ғой» деген Гафурова осылайша Көк туымызды көкте желбіреткен еді.
Дулатбек Құсбеков секілді білікті бапкерден тәлім алған Гузалия Гафурова бабында жүрген кезде каратэ спорты Олимпия ойындарының бағдарламасына енгенде қазақстандық спортшы төртжылдықтың басты додасынан да олжалы оралар ма еді, кім білсін?
