Университеттің «Гуманитарлық ғылымдар және заң» факультеті, «Филология» кафедрасына қарасты қазақ тілі мен әдебиеті мұғалімдерін даярлау бағдарламасы студенттерінің ұйымдастыруымен өткен әдеби-сазды кеш ақынның өмірі мен шығармашылығы туралы дерек беретін бейнебаяннан басталды. Ақынның өлеңдерін, поэмаларын мәнеріне келтіріп орындауда студент-жастар керемет шеберліктерін көрсетті. Студенттер «Мен деп ойла», «Айтатын саған сырым бұл», «Есіңе мені алғайсың» әндерін тамылжыта орындады. Арайлым Әшірәлі мен Аружан Оңалтай ақынға арнаған өздерінің өлеңдерін оқыды. Студенттердің «Жетімдер үні» мен «Мұқағалидың туған күні» қойылымы да көрерменнің поэзия саңлағына деген көзқарасына, ой-парасатына айқын мән кіргізді.
– Аталған іс-шараның басты мақсаты – Мұқағали Мақатаевтың өмірі мен шығармашылығына шолу жасау. Ақын поэзиясының халыққа кең таралуының мәні және оның өміршеңдігінің сыры неде екендігін таныту, ақындық талантын шәкірт жүрегіне ұялату, сол арқылы олардың бойында поэзия әлеміне, жалпы сөз өнеріне деген сүйіспеншілікті берік қалыптастыру. Айшықты астармен, тартымды тұспалмен, ұтқыр ұйқаспен көмкеріліп, рухани терең тебіреністің өрнекті өзегінен өрбитін көмескіге көзі қырағы біртума ақынның оралымды ойлары, күйінішті жан күйзелісі, сүйінішті сырлы сезімі айырықша дарынды, сағыныш сарынды өлмес өлең жолдарынан келісті көрініс тауып, жыр сүйер қауым Мұқағали рухына тағзым етіп, жан тебірентерліктей әсерлі өлеңдері арқылы өзімен сырласқандай күйде болды, – дейді философия докторы Мұратбек Анарбайұлы.
Түркістан облысы
