Екі мыңнан аса көрерменге арналған үлкен зал лық толы болып, концерт билеттері небәрі екі-ақ күнде сатылып кеткен. Берлин филармониясының өкілдері мәлімдегендей, бұл пандемия басталғалы бері алғашқы толық аншлаг жинаған концерт екен. Кеште көрерменнің оркестрге деген ыстық ықыласы, Бетховен музыкасының танымалдығы мен қазақстандық музыканттардың өнеріне деген қызығушылық үйлесім тапты.
«Әлемдік қауымдастық елімізді қаңтардағы оқиғалардың салдарынан саяси катаклизмдер аренасы ретінде қабылдағаны белгілі. Бірақ FORTE TRIO өз өнерлері арқылы Қазақстанды мәдениеті жоғары деңгейде дамыған, өзіндік музыкалық дәстүрлері қалыптасқан мемлекет ретінде көрсете білді. Трионың өнерін жоғары бағалаған шетелдіктер біздің әртістерді концерттен кейін сахнаға тағы 5 рет шақырды», деді «Қазақконцерт» директорының орынбасары Лаура Ахметова.
Өткен жылдың желтоқсан айында FORTE TRIO Францияның төрт қаласында концерт өткізіп, осы елдің 2021 жылғы концерттік маусымын аяқтағаны мәлім. Енді отандық музыканттар Германия елінің өнерсүйер қауымын тамсандырып, ковидтік шектеулерден шаршаған тыңдармандарға ұмытылмас жарқын эмоция сыйлады.
Қазақконцерт құрамына кіретін FORTE TRIO ансамблі Қазақстанның еңбек сіңірген қайраткері Тимур Урманчеевтің көркемдік жетекшілігімен өнер көрсетеді. Ұжымның мақсаты – қазақстандық классикалық музыканы әлемге таныту.
Ал қазақстандықтар FORTE TRIO ұжымының өнерін 2 наурыз күні «Астана Опера» театрында өтетін «Любите ли вы Брамса?» атты жаңа концертте тамашалай алады.
