![Алматыда өртенген пәтерден ер адам құтқарылды](/media/2022/02/24/220224113236465e.jpg)
Алматы ТЖД баспасөз қызметі 23 ақпанда сағат 01:20-да «101» пультіне Әуезов ауданының 4 шағын ауданындағы төрт қабатты үйдің дабыл қаққан тұрғындарынан қоңырау түскенін хабарлады.
Оқиға орнына бірнеше бөлімшенің өрт сөндіру жасақтары жіберілді.
«Өрт сөндіру жасақтары оқиға орнына 7 минуттан кейін келді. Өрт сөндірушілерді көршілер қарсы алып, өртенген пәтерде балалар болуы мүмкін екенін жеткізді. Пәтерінде қамалып қалған ер адам үйдің артқы жағында тормен жабылған терезе арқылы көмекке шақырды. Улы түтіннен таза ауаға тек ашық желдеткіш арқылы шығуға болатын еді, бірақ темір тордың кесірінен ер адам пәтерден шыға алмай қалды», деп атап өтті ТЖД қызметкерлері.
Қарауыл бастығы металл торларды бұзып, жанып жатқан пәтерге терезе арқылы кіруге шешім қабылдады. Нәтижесінде 51 жастағы ер адам отты тұзақтан аман шығарылып, жедел медициналық жәрдем бригадасына жөнелтілді. Бірнеше сағаттан кейін құтқарылған адам үйіне жіберілді.
«Өрт 14 минут ішінде ауыздықталып, сағат 01:54-те толықтай сөндірілді», деп толықтырды ведомстводан.
Белгілі болғандай, электр сымдарының қысқа тұйықталуынан үйдегі жиһаз жанып кеткен.