Қуаныш

Елбасымыздың 14 ақпан күні Үкіметтің кеңейтілген отырысында азаматтық қызметшілердің жалақысын, зейнеткерлердің зейнетақысын, сондай-ақ, жәрдемақыларды көтеру жөнінде берген тапсырмасының орындала бастайтын уақытына да санаулы күндер ғана қалды. Яғни, тапсырма 1 сәуірден бастап жүзеге аспақ. Осыған орай ел өңірлерінен редакция поштасына қуаныштарын жеткізген, алғыстарын білдірген лебіздер легі ағылуда. Төменде соның біразын жариялағанды жөн көрдік.

ЖІГЕРІМІЗДІ АРТТЫРА ТҮСЕТІНІ АНЫҚ

Үстіміздегі жылдың ақпан айының ортасында Мемлекет басшысы Нұрсұлтан Назарбаевтың Үкіметтің кеңейтілген мәжілісінде азаматтық қызметкерлердің жалақысын, зейнеткерлердің зейнетақысын және жәрдемақы­ларды кезектен тыс көтеру жө­нін­дегі Үкіметке берген тап­сыр­масын тыңдағанымда бір жақсылықтың нышанын сезген­дей қуанып қалған едім. Осы қуа­нышым бекер емес екен. Енді, міне, мен жұмыс істейтін Өскемен қаласындағы темір- жол қызметкерлеріне арналған аурухана ұжымындағылардың да жалақысы 1 сәуірден бастап 10 пайызға көтерілетіндігін естідік. Осы жайында хабар жеткен кезде қызметкерлер бірін-бірі құттықтап жатты. Менің бұл ауруханада бала­лар дәрігері болып қызмет істей бастағаныма біраз жылдардың жүзі болды. Жалпы еңбек өтілім жиырма жылдан асып барады. Дәрігер жұмысы жеңіл емес. Өйт­кені, әр адамның денсаулығына деген жауапкершілік жүгі мол болса, балалар жағдайына келгенде мұның салмағы тіпті де еселей түсетіндігі анық. Әрине, бейнетті еңбектің кім игілігін көргісі келмейді. Осы тұрғыдан алғанда соң­ғы уақыт­тары Мемлекет бас­шы­сының тапсырмасына сәйкес денсаулық саласына зор көңіл бөлініп жатқандығы, жаңа медициналық технологиялардың енгізілуі, дәрігерлердің еңбекақыларының ауық-ауық арттырылып оты­руы біздің саламыздың халық алдындағы маңызы мен жауап­кершілігінің зор екендігін білдіретін болса керек. Біздің ұжымымыздың мүшелері де осы талап деңгейінен көрінуге ұмтылыс танытып отыр. Өз ұжымым туралы бір-екі ауыз сөз айтатын болсам, темір­жол­шыларға арналған біздің аурухана ұзақ жылдардан бері жұмыс істеп келе жатқан білікті ұйымдардың қатарынан саналады. Дәрігерлердің бір-біріне деген құрметі мен сыйластығы да жақсы. Қысқасын айтқанда, бір жағадан бас, бір жеңнен қол шығарып дегендей ұйымшылдықпен еңбек ету үстіндеміз. Ал 1 сәуірден бастап жалақымыздың 10 пайызға көтерілетіндігі біздің қызметке деген жігерімізді одан әрі арттыра түсетіндігі анық. Қарлығаш САЛЫБАЕВА, Өскемен қаласындағы теміржол ауруханасының балалар дәрігері.        ________________________

ШЫНАЙЫ ҚАМҚОРЛЫҚ ЖЕМІСІ

Кітап – білім бұлағы. Осы бір қанатты сөз менің өміріме ерек­ше із қалдырды. Мектепте жүрген кезден-ақ кітапқа ерекше құмар болдым. Осы құмарлық ақыры менің мамандық таңдауыма да ықпал етті.  Міне, 30 жылдан астам уақыттан бері мен кітапханашы болып еңбек етіп келемін. Еңбек жолымды Сәкен Сейфуллин атындағы Ақмола (Целиноград) облыстық кітапханасында бастаған едім. Бүгінде  Астанадағы Назарбаев орталығында кітапханашы болып еңбек етемін. Біз осы уақытқа дейін өз еңбегімізде Елбасының ерек­ше қамқорлығын сезініп келе­міз. Жасыратыны жоқ, кітап­х­анашылар алатын еңбекақы  үлкен емес.  Соған байланысты бізге мемлекет тарапынан ұдайы қам­қорлық жасалып келеді. Үсті­міздегі жылғы 14 ақпанда өткен Үкіметтің кеңейтілген отыры­сында Мемлекет басшысы теңге бағамының өзгеруіне байла­нысты халықты әлеуметтік жағынан қолдаудың кешенді шараларын ұсынған болатын. Үкімет отырысында Елбасы Нұрсұлтан Назарбаев «Халықты әлеуметтік қолдаудың кешенді шараларын қабылдау керек. Үстіміздегі жылдың 1 сәуірінен бастап мемлекеттік мекемелер мен мемлекеттік қазынашылық кәсіпорындарында қызмет ететін азаматтардың еңбекақыларына ай сайын 10 пайыз үстеме төленуін қарастыруды тапсырамын», деп атап көрсетті. Сонымен бірге, Елбасы өзінің биылғы Жолдауында 2015 жылдың 1 шілдесінен бастап азаматтық қыз­меткерлерге ең­бекақы төлеу­дің жаңа моделін жасау туралы Үкіметке нақты тап­сыр­­ма берген болатын. Осы тап­сырмаға байланысты әлеу­меттік сала қызметкерлерінің қатарына кіретін біздің, кітапха­нашылардың еңбекақысы 40 па­йыз­ға дейін өсетінін естіп білдік. Міне, ертең 1 сәуірден бас­тап еңбекақымыз 10 пайызға өсетін болды. Бұл біз үшін үлкен әлеуметтік қолдау. Мен әріп­тестерімді осы шынайы қам­қорлыққа сай жемісті еңбек етуге шақырамын. Гүлнар ӘБДІРАХМАНОВА, Назарбаев орталығының кітапханашысы. АСТАНА. _______

АЛҒЫСЫМЫЗ ЗОР

Елбасы теңге бағамының өзгеруінен соң жедел жиын өткізіп, мемлекеттік мекеме­лер мен кәсіпорындарда жұ­мыс істейтін азаматтық қыз­мет­керлердің жалақысын өсіру жөнінде тапсырма берген еді. Бұл мәселе, ең алдымен, білім, ғылым, денсаулық сақтау, мәдениет, спорт және әлеуметтік қорғау са­ласының қызметкерлеріне бай­ланысты екенін баса айтты. Яғни, сәуірдің бірінен бастап жалақымыз 10 пайызға көтері­летін болды. Әрине, бұл – біздер үшін жақсы жаңалық. Әне-міне дегенше, міне, сәуір де болып қалыпты. Сәтін салса, алдағы ай­да Елбасы айтқан 10 пайыз қосымшаға қол жеткіземіз деп күтіп отырмыз. Өткенде те­ле­ди­дардан Президенттің осы тапсырмасына орай әлеуметтік көмек көлемін көтеру туралы заң Мәжілісте мақұлданғанын естідік. Онда зейнетақы, мүгедектер мен көпбалалы отбасылар сияқты жәрдемақының барлық түрі өсетін болады делінген. Сондай-ақ мұғалімдер мен дәрігерлердің де жалақысы көтерілетіні айтылды. Бұған қажетті 116 миллиард теңге бюджеттен бөлініпті. Бұл мемлекет тарапынан біздерге жа­салған зор қамқорлық деп біле­міз. Біздің үйде мен де, менің әйелім де мұғалім. Сондай-ақ, анам зейнетақы алады. Яғни, бұл 10 пайыз өсім біздің отбасымыз үшін біршама кіріс болағалы тұр. Ол үшін Елбасына алғысымыз зор. Бауыржан ДАУЫЛБАЙҰЛЫ, мұғалім. Ақмола облысы, Целиноград ауданы, Қажымұқан ауылы.