Әнші мерейтойы көктемнің алғашқы күнінде көңілге көрік берген тамаша көрмемен басталды. «Қазақконцерт» мемлекеттік концерт ұйымының ғимаратында ашылған көрмеде аты аңызға айналған әншінің өнердегі алғашқы қадамдары мен зор жетістіктері, соғыс жылдарындағы қайсарлығы, азаматтық биік парасаты, өмірінің жарқын сәттерінен фотосуреттер мен құнды жәдігерлер қамтылған. Айтулы көрмені ұйымдастыруға әншінің ұлы Тәжен мен келіні Марал тікелей атсалысып, көрме төріне өнер иесінің сирек суреттерін ұсыныпты. Сондай-ақ мәдени оқиға аясында Роза Бағлановаға арналған эксклюзивті мүсін таныстырылды. Өнер туындысының авторы – гиперреалист мүсінші Айдос Есмағамбетов.
Салтанатты іс-шара одан әрі «Қазақтың қаһарман қызы» атты мазмұнды концертке ұласты. Кешті Мәдениет және спорт министрі Дәурен Абаев беташар сөзімен ашып, ЮНЕСКО деңгейінде тойланатын тұлғалар тізіміне енген даңқты әншінің ғасырлық тойы ресми түрде басталғанын айрықша атап өтті.
Есімі аңызға айналған әншінің қазақтың ән өнері мен руханиятына сіңірген еңбегі ересен. Әсіресе майдан даласында оқ пен оттың ортасында жүріп салған әні соғысқа қатысқан талай сарбаздың жанына жігер сыйлап, жеңіске деген қадамды жақындатуға септескені анық. Роза Тәжібайқызы – Халық Қаһарманы атағына ие болған Қазақстандағы жалғыз әнші. Ол өмірінің 70 жылынан астамын сахнада өткізіп, әлемнің 50-ден аса елінде болып 25 тілде ән шырқаған. Сөйтіп жарты ғасырдан астам уақыт бойы қазақ халқының дәстүрлі мәдениеті мен өнерінің өркендеп, әлемге танылуына үлкен үлес қосты. Роза Бағланованың орындауындағы «Ақмаңдайлым», «Іңкәрім», «Әдемі-ау», «Ақ тамақ», «Ақсұңқарым». «Ах, Самара – городок» әндері әншінің әсем даусымен бірге халықтың жанына берік орнығып, ел жүрегінде мәңгілік жатталған.
Қазақ өнерінде қайталанбас із қалдырған тарихи тұлғаның мерейтойына арналған кеште Роза Бағланованың өмірі, шығармашылығы жайлы арнайы дайындалған бейнеролик көрермен назарына ұсынылды. Роза Рымбаева, Тамара Асар, Ренат Гайсин, Жұбаныш Жексен, Айгүл Қосанова, Зарина Алтынбаева, Әміре, Рухия Байдүкенова, Жанэт (Беларусь), Хулкар Абдуллаева (Өзбекстан), Мирбек Атабеков (Қырғызстан) бастаған еліміздің және шетелдің танымал әртістері, сонымен қатар Роза Бағланованың немересі Үрбибі Бағланова да өз өнерін халыққа паш етті.
Әншінің өнегелі өмірі мен шығармашылығын насихаттау шаралары мұнымен әсте тоқтамақ емес. Еліміздің барлық өңірінде жыл бойы Роза Бағланованың мерейтойына арналған фестивальдер мен концерттер, мазмұнды кештер мен семинарлар, құнды көрмелер мен маңызды конференциялар өткізілетін болады.
