Осы додада дараланған дарабоздар халықаралық IMO олимпиадасына қатысу үшін Қазақстанның ұлттық құрамасына кіру мүмкіндігіне ие болады. Осыған қоса жүлдегерлердің дипломдары болашақта университеттерге түсуде артықшылық береді. Мысалы, егер үміткерлер бірдей ұпай жинаса, онда басымдық, яғни оқуға түсу құқығы олимпиадашыға беріледі.
Әл-Фараби атындағы Қазақ ұлттық университетінде офлайн форматта өткен «Жібек жолы» олимпиадасына Қазақстан, Өзбекстан, Қырғызстан, Түрікменстан, Түркия, Әзербайжан, Қытай, Тәжікстан және Ұлы Жібек жолының бойында орналасқан басқа да елдерден оқушылар қатысты.
«Дарын» республикалық ғылыми-практикалық орталығының директоры Тимур Нұркешов: «Биыл «Жібек жолы» математикалық олимпиадасына 10 елдің командасы қатысты. Қазақстаннан 7-11-сынып аралығындағы 136 оқушы қатысты. Олардың барлығы – «Математика» пәні бойынша 2020-2021 оқу жылының республикалық олимпиадасының және республикалық жасөспірімдер олимпиадасының облыстық және қорытынды кезеңдерінің жеңімпаздары мен жүлдегерлері. «Жібек жолы» олимпиадасының қорытындысы бойынша ұпайлар жеңімпаздарға Халықаралық математикалық олимпиадаға (IMO) қатысу үшін Қазақстан Республикасының ұлттық құрама командасына кіруге мүмкіндік беретінін атап өткім келеді», дейді.
Ұйымдастырушылардың айтуынша, олимпиаданы әр ел өз аумағында өткізген. Алайда барлық мемлекеттен келген зияткерлік жарысқа қатысушылардың қорытынды нәтижелерін Қазақстанда болған қазылар алқасы қарады.
Олимпиада нәтижесі бойынша 8 оқушы I дәрежелі, 14 оқушы II дәрежелі және 24 оқушы III дәрежелі дипломдармен марапатталды. Ал 2021 жылы қазақстандық зияткерлер Халықаралық «Жібек жолы» математикалық олимпиадасында 3 алтын, 19 күміс және 27 қола медаль жеңіп алған болатын.
